Wa damha nga ang daob sa gipahigayon nga clean up drive alas 8 sa Sabado sa buntag, Abril 13, 2024, sa Sityo Luwak, Brgy. Canbanua, Argao, habagatang Sugbo nakamugna og grass fire.
Butyag ni Joie Mae Banchua, sakop sa 4Ps, nga gikahinabi sa Superbalita Cebu, nga diriyot maabti ang kawayanan apan napawong ra ang kayo.
Matod niya nga sila kada Sabado magpahigayon og clean up drive ug may sagbot silang gitapok ug gidauban.
Ila kinining gibantayan hangtod mapawong apan sa wa damha kalit nga nidako ang kayo.
Dali sila nga nakapanawag og bombero hinungdan nga napasiritan og tubig ug napawong ang kayo. / DVG