Aloguinsan namungot

Nabuhian pagbalik og paglaum ang Aloguinsan cagers human sila nakarehistro og duha ka sunodsunod nga mga kadaugan sa 2nd Mayor Inocentes Cabaron Inter-town Invitational basketball tournament Group A ning bag-uhay lang sa Moalboal Covered Court sa lungsod sa Moalboal, Cebu.

Human sila nabunygan og pilde batok sa Dumanjug, 85-75, ang Aloguinsan namungot sa Argao, 93-91, niadtong Sabado, Marso 23, 2024, ug Badian. 72-60, pagkasunod adlaw.

Ang maong mga kadaugan sa Aloguinsan gipangulohan ni Andre Caminos Cuizon, Jan Debutac ug Reggie Cuerda.

Naggukod ang Aloguinsan sa halftime, 48-42, batok sa Argao dihang nakigkumboya si Cuizon nila ni Debutac ug Cuerda aron agakon ang Aloguinsan sa kadaugan.

Ning sangkaa, nimugna og game-high 22 puntos si Cuizon samtang ningtampo og 17 puntos matag usa sila si Debutac ug Cuerda.

Batok sa Badian, ang Aloguinsan gipangulohan ni Debutac pinaagi sa iyang 17 puntos.

Ang Aloguisan ningsaka sa 2-1 nga rekord, natagak ang Badian sa 1-2 samtang nahulog sa 0-1 ang Argao.

Sa laing duwa, ang Boljoon nipagawas og never-say-die nga kinaiya sa ilang pagbuntog sa Alcantara, 82-80.

Ang Alcantara ningkombati nga aduna ra’y pito ka mga magduduwa apan sa pagpangulo nila ni John Kelvin Macasaol ug JC Ypanto, nakamaneho sila pagposte og 60-53 nga labaw human sa tulo ka quarters.

Hinayhinay nga ninggukod ang Boljoon pagsugod sa 4th quarter sa pagpangulo nila ni Kenjie Gumera ug Epoy Caneda hangtod nga nakaipsot gyud sila dala ang kadaugan.

Ang Boljoon ningsaka sa 1-1 nga rekord samtang ningsukarap ang Alcantara sa 0-3 nga baraha.

Sa lain pa nga engkuwentro, nimugna og 28 puntos ang kanhi magduduwa sa Philippine Basketball Association (PBA) nga si Jojo Tangkay aron pangulohan ang kadaugan sa Dumanjug batok Ronda, 103-85.

Ang Dumanjug ningsaka sa 2-0 nga rekord. (ESL)