Lolo nadasmagan sa multicab, patay

Dead on arrival (DOA) sa tambalanan ang 76 anyos nga lolo nga nadasmagan sa usa ka multicab sa provincial road sa Dapdap, Barangay Poblacion 3, siyudad sa Carcar, alas 4:00 sa hapon, Biyernes, Marso 15, 2024.

Ang biktima mao si Dios­coro Aguilar De Gracia, 76, minyo, ug molupyo sa naasoy nga dapit.

Samtang ang multicab pick-up, gimaneho sa tag-iya niini nga si Josephus Largo Dinampo, 56, minyo, ug taga Purok 2, Barangay Zaragoza, lungsod sa Aloguinsan.

Sa pasiunang imbestigasyon ni Police Cpl. Jerome Palao, ang assistant traffic investigator sa Carcar City Police Station, nasayran nga ang biktima naglakaw sa daplin sa karsada.

Apan, matod pa nga wa ma bantayi ang biktima sa drayber sa multicab nga gikan sa Zaragoza, Aloguinsan hinungdan nga nadasmagan.

Ang biktima nga nakabaton og kadaut sa iyang lawas ug gidala sa Cebu Provincial Hospital sa Carcar apan, ang biktima gideklarar nga DOA sa attending physician nga si Dr. Fidel Cascabel.

Ang drayber sa multicab gikustodiya na sa kapulisan sa Carcar ug nagpaabot sa tukmang kaso nga ipasaka sa pamilya sa biktima batok niya. (DVG)