Namatay diha-diha ang usa ka drayber sa motorsiklo nga nabangga sa usa ka trak sa Miyerkules sa alas 2:24 sa kaadlawon, Marso 13, sa national highway sa sityo Lourdes, Brgy. Poblacion, lungsod sa Liloan, amihanang Sugbo.
Gituohan nga nakatagpilaw ang biktima samtang nagmaneho hinungdan nga ni-counterflow sa pikas lane nga gisubayan sa cargo truck.
Ang biktima giila sa kapulisan nga si Josh Laurene Raboy, 21, taga Brgy. Lamac , Consolacion, samtang ang drayber sa cargo truck giila nga si Cherryle Tatoy Brigole, 39, minyo, taga Camaligbato, Taboc, Siyudad sa Danao, amihanang Sugbo.
Base sa imbestigasyon ni Patrolman Jomar Lanticse, traffic police investigator sa Liloan Municipal Police Station, ang cargo truck padulong sa south samtang ang motorsiklo padulong sa north.
Asoy sa truck boy ngadto sa kapulisan nga mingaw kaayo ang dan niadtong higayuna sa ilang pagtadlas.
“Wala nay lain gi-overtookan, Sir. Mingaw ang dan anang orasa segun sa nakasaksi nga helper sa driver sa maong truck. Ilang duda sanglit nakatulog daw,” chat ni Lanticse sa Superbalita Cebu.
Nagbangga ang duha ka mga sakyanan nga tungod sa kakusog sa impact, nalagpot si Raboy ug namatay diha-diha.
Ang drayber sa cargo truck naa na sa kustodiya sa kapulisan sa Liloan ug nakigsulti sa mga tagtungod alang sa amicable settlement sa pagsuwat ning taho.
TRAK NATUMBA
Milagro nga wa maunsa ang drayber ug truck boy sa usa dakong trak nga nagguyod og usa ka dakong container van nga gikargahan og abuno human nibangga sa lubi, natumba ug natumbahan pa sa lubi.
Nahitabo kini alas 4:02 sa hapon sa Miyerkules, Marso 13, sa Purok Catleya, Brgy. Lanas, Siyudad sa Naga.
Kini ang gibutyag ni Michelle Basilan, purok leader, nga nakaresponde sa maong dapit nga gikahinabi sa Superbalita Cebu.
Matod niya nga ang trak nga gimaneho ni Archie Villahermora, taga Cawayan, Dalaguete, padung sa Siyudad sa Toledo.
Pagliko sa kurbada, nidasmag sa kilid sa bukid ug naigo ang lubi, nabali ug natumba ang trak.
Si Villahermosa gikataho nga nawad-an lang sa kontrol sa iyang pagmaneho.
Gipabantayan ni Basilan ang dapit kay kurbadahon ug masegurado usab ang mga fertilizer nga hayan kawaton sa mga mapahimudsanon kon way magbantay.
Nitubag sa alarma ang City of Naga Disaster Risk Reduction and Management Office ingon man Cebeco kay apektado ang linya sa kuryente tungod sa nadaut nga usa ka poste.
