MALAMPUSON nga naluwas ang usa ka Philippine tarsier (Carlito syrichta carbonarius) sa sakop sa Citizen Armed Force Geographical Unit (Cafgu) Active Auxiliary (CAA) sa Sitio Lampaki, Barangay Kimarayag, Pigcawayan, Cotabato Province.
Matud pa ni Municipal Environment and Natural Resources Office (Menro) Officer Joaquin Tacula nga gihatud gilayon sa sakop sa CAA kinsa wala panganli ngadto sa ilang buhatan ang tarsier ug anaa na kini sa maayong kahimtang.
Giingong nahulog ang tarsier sa punoan sa kahoy ug gigukod sa iro nga daling giluwas sa sakop sa CAA.
Gitin-aw ni Tacula nga “disturbed habitat” maoy usa sa mga rason nganong motungha o masaag ang mga wildlife species sama sa tarsier sa usa ka lugar.
Dugang ni Tacula nga ang tarsier nailhan nga usa sa “world’s smallest primates” nga nagpuyo sa lati o kabukiran sa utlanan sa Pigcawayan ug Alamada sa Cotabato Province.
Dili kini ang unang higayon nga dunay nakitang tarsier sa lungsod sa Pigcawayan.
Samtang giawhag niini ang mga molupyo sa probinsiya nga kung makakita og tarsier, ipahibalo gilayon ngadto sa Menro aron nga ma-rescue dayon.
Gipahimangnoan usab niini ang publiko nga ang mga tarsier ug uban pang wildlife dili patyon, dakpon, pasakitan, ibaligya ug kan-on subay sa Republic Act 9147, o ang “Wildlife Resources Conservation and Protection Act of 2001.”
