Si Lapu-Lapu City Lone District Representative Cindi King-Chan, nagtinguha sa pagdani og dugang mga turista gikan sa Kingdom of Thailand human sa iyang pagduaw sa maong nasod.
Nasayran nga ang Thailand ug Pilipinas pulos naila nga tourist destination gumikan sa mga baybayon ug susama sab ka maabibihon ngadto sa mga bisita ug ubang mga maayong hiyas.
Atol sa iyang opisyal nga tour, giduaw sa kongresista ang buhatan ni Millicent Cruz-Paredes, Ambassador Extraordinary Plenipotentiary sa Republika sa Pilipinas didto sa Thailand.
Ilang gituki ang mga plano sa pagdasig sa mga Thai nga turista nga mobisita sa Pilipinas, partikular na sa dakbayan sa Lapu-Lapu.
Namatikdan nga daghang mga Pilipino ug langyawng mga turista nga moduaw sa Thailand ilabi na sa ilang Capital, ang Bangkok nga adunay susamang ikatanyag nga bugtong sa Lapu-Lapu nila masuwayan gawas sa kasaysayan lakip na ang natural ug kultural nga atraksyon.
