COTABATO CITY -Panimalos ang motibo sa mga terorista sa pagpabusikad og granada kampo sa militar alas 9:30 sa gabii, Martes, Pebrero 20, 2024, sa Shariff Aguak, probinsiya sa Maguindanao del Sur.
Sa maong insidente, duha ka sundalo ang naangol, apil na ang usa ka sakop sa Cafgu Active Auxiliary nga sila Staff Sergeant Jester Arsulo ug Sergeant Bryan Baylon ug CAA Datu Nor Akmad sa 43rd Infantry Battalion, Philippine Army.
Gibutyag ni 601st Brigade Civil Military Operations Officer Major Saber Balogan nga gilabay og granada sa mga sakop sa Dawlah Islamiyah Hassan Group ang Patrol Base sa 43rd IB ug CAA sa Barangay Timbangan, Shariff Aguak, Maguindanao del Sur.
Apan bisan og samaron, nakahimo pa og bawos ang mga sundalo ug CAA batok sa mga kaaway nga nilungtad og 30 minutos una niatras human nigamit na ang militar og mortar.
Di pa matino kung duna ba’y nasamdan o napatay sa bahin sa mga terorista apan padayon ang hot pursuit operation sa Joint Task Force Central batok kanila.
