Lalaki kadulog sa asawa gidunggab sa bana, patay

Tungod sa tumang panga­bubho sa bana, gidunggab-patay ang lalaki nga iyang nasakpan nga kadulog sa iyang asawa, samtang samdan usab ang naulahi.

Ang insidente nahitabo sa Barangay Lorega San Miguel, Siyudad sa Sugbo, alas 4:00 sa kaadlawon, Dominggo, Peb­rero 4, 2024.

Ang namatay giila nga si Rene (dili tinuod ngan), 30, ulitawo apan dunay kapuyo, ug molupyo usab sa samang dapit.

Ang suspek mao si Mario (dili tinuod ngan), bana ni Evelyn (dili tinuod ngan), 31, kinsa samdan usab tungod sa pagdunggab, pulos mga molupyo sa maong dapit.

Sa pakisusi sa Superbalita Cebu sa Parian Police Station, nasuta sa ilang imbestigasyon nga ang suspek ug ang iyang asawa ‘nagkabuwag na’ diin ang lalaki naglain sa pagpuyo.

Apan ang bana nasuko dihang nakadawat og sumbong nga ang iyang asawa dunay kadulog nga laing lalaki sud sa balay nga gipuy-an sa babaye.

Dugang sa imbestigasyon sa kapulisan, nasuta nga ang bana nisulong ug iyang giguba ang agianan sa balay hinungdan nga nakita niya ang duha nga pulos hubo nga naghigda sa kama.

Gidunggab dayon sa bana ang lalaki lakip ang iyang asawa.

Si Rene nakaangkon og daghang samang dinunggaban sa nagkadaiyang bahin sa iyang lawas ug gideklarar kini nga dead on arrival sa tambalanan.

Samtang si Evelyn, naa na sa luwas nga kahimtang human makabaton lang og usa ka samad sa iyang bukton.

Dugang sa imbestigasyon sa kapulisan, nagkanayon si Evelyn nga wala silay relasyon ni Rene nga giingong iya ra kini gipakatulog sa ilang balay kay nahubog sa ilang panag-inom.

Ang suspek dali ra hinuon nga nadakpan sa kapulisan sa Parian Police Station nga gipangulohan sa ilang station commander nga si Police Maj. Henry Orbiso.

Ang suspek nga bana gitanggong na sa kapulisan samang nagpaabot sa tukmang kaso nga ipasaka batok kaniya.