Taas ang bakasyon ni Mayor Michael Rama sa Australia sa miaging tuig. Kapin sa usa ka buwan siya didto uban sa iyang pamilya. Karon, niadto na sab siya og Singapore sulod sa pipila ka mga adlaw.
Bisan layo siya, nipadagan gihapon siya sa mga kalihukan sa Siyudad.
Unsa kahay rason ni Rama nga nagsige man siya og biyahe sa abroad nga way pagpasabot kon ngano? Okay ra unta kon usa siya ka pribado nga tawo, apan siya ang chief executive sa labing malambuon nga dakbayan gawas sa Metro Manila.
Di tiaw ang pagpadagan og lokalidad nga sama kadaku sa Cebu City. Gikinahanglan ang inadlaw adlaw nga pagtagad sa pagpadagan sa mga buhatan nga di mahimo nga i-remote lang.
Mao nang di siya makalikay sa pag-intriga sa iyang mga kritiko ug kaatbang nga hayan siya masakiton ug nagpatambal sa abroad. Kay gikan pa sa uwahi nga bahin sa 2023 siya nagsige og larga.
Mas maayo unta kon ipasabot sa mayor ang iyang mga biyahe nga wa buhata sa iyang mga counterpart sa Mandaue, Lapu-Lapu ug Talisay. Kini nga mga mayor naa kanunay sa ilang buhatan makita.
Si Mayor Junard “Ahong” Chan naa gani makita kanunay sa gawas sa iyang buhatan nagtagad bisan sa gagmay nga mga problema sa iyang mga konstituente. Maora siya og barangay kapitan kay visible siya kanunay sa iyang mga konstituente.
Si Mayor Samsam sab kada adlaw nagtagad sa mga problema sa Talisay aron maaksyunan gilayon.
Lahi ra kon naa ang labing dako nga opisyal sa usa ka lokalidad kon dunay mga problema nga gikinahanglan nga matagad gilayon, kay sa itugyan lang ngadto sa mga department head.
Way kwestyon sa kakugihan ni Rama kay kon naa siya sa siyudad kanunay siyang nagtagad sa mga problema ug panginahanglan sa katawhan.
Daghan ang dagko nga mga problema nga gikinahanglan nga tutokan, sama sa pagkolekta og buhis aron igasto sa dagko nga mga proyekto. Naa pa ang task force nga gitahasan sa pagsulbad sa baha ug nagkagrabeng suliran sa trapiko.
Kon mo-relax ang mayor, mas nindot pa dinhi sa Pilipinas kay sa abroad.
