Cebu City Olympics sugdan na

Moabot ngadto sa kapin sa 10,000 ka mga atleta ug opisyales ang magkatapok ning Sabado, Enero 27, 2024, sa opening ceremony sa 31st Cebu City Olympics sa Cebu Coliseum.

Nagkadaiyang sporting events ang kombatihan sa kompetisyon nga mahuman karong Pebrero 2, 2024.

Apan nagkanayon si Francis Ramirez, DepEd Division sports coordinator, nga tungod sa padayong renovation sa Cebu City Sports Center, ang medal-rich events nga swimming ug athletics ipahigayon sa gawas sa Cebu City.

Duwaon kini sa Naga City Sports Complex sa City of Naga, Cebu.

Hinuon, giklaro ni Ramirez nga mayorihiya sa sporting events kombatihon sa Cebu City.

Ang ubang sporting events nga sangkaon mao ang archery, arnis, baseball, basketball, badminton, billiards, boxing, chess, dancesports, gymnastics, football, futsal, karatedo, scrabble, sepak takraw, softball, taekwondo, tennis, table tennis, volleyball, wrestling, wushu, pencak silat, ug para games.

Ang Cebu City naggahin og P12 milyunes nga pundo aron gamiton sa pagpahigayon ning maong kompetisyon nga maoy basihan sa pagpili sa mga atleta nga morepresentar sa Cebu City alang sa regional meet, nga nagsilbeng qualifying event alang sa Palarong Pambansa.

Ang renovation sa CCSC nagsilbeng usa sa mga lakang sa Cebu City alang sa pag-host niini sa Palarong Pambansa karong Hulyo, 2024.

Ang mga partisipante sa Cebu City Olympics pulos student athletes sa Cebu City gikan sa nagkadaiyang mga tunghaan.