DAVAO DE ORO – Usa ka pamilya ang kompirmadong patay human nga natabunang buhi sa midahiling yuta didto sa Purok 20, Pag-asa, Barangay Mt. Diwata, Diwalwal, Monkayo alas 2 sa hapon, Huwebes, Enero 18, 2024.
Sa inisyal nga impormasyon, gibana-banaang anaa sa 20 ka mga indibidwal ang natabunan gikan sa 4 ka mga balay nga naigo sa landslide.Â
Naglisud ang mga rescuers sa pagkuha sa mga biktima tungod sa way hunong nga pag-ulan.Â
Tungod niini, alas 3:30 Huwebes sa hapon, giundang ang search and retrieval operations.Â
Nasayran nga adunay nagpahigayon og prayer meeting sa usa sa mga balay hinungdan nga daghan ang tawo.
Subay sa gipagula sa awtoridad nga mga pangalan sa mga biktima, ang mga namatay nailhang sila Gumatin Catherine, 27-anyos; Gumatin Hannah, 9-anyos; Gumatin Dysna, 3-anyos; Gumatin Arjay, 1-ka tuig; Gumatin Cristelle, 10-anyos; Gumatin Ailee, 8-anyos ug Nenaria, Marjomie, 33-anyos.
Ang upat ka mga na-missing nailhang sila, Gumatin Rommil, 36-anyos; Bitoon Agnes, 44-anyos; Saldua Elvera, 35-anyos; ug Riboldad Ritchel, 35-anyos.
Ang mga nakalingkawas ug samdan nailhang sila Cruda Dexter, 19-anyos; Cruda Bernadeth, 51-anyos; ug Delola Amara Kate, 1-ka tuig.
Sa Davao City, patay sab ang usa ka Ernesto Basites Pacinio, 43-anyos, residente sa Purok 5, Tigatto human nga nadahilian og yuta alas 8:10 sa gabii diin laing duha samaron nga anaa sa Southern Philippines Medical Center (SPMC).
Patay sab ang usa ka 7-anyos nga bata samtang samdan ang iyang mga ginikanan atol sa nahitabong landslide alas 9 Huwebes sa gabii, Enero 18, 2024, didto sa Sitio Calachuchi, Brgy. Salaysay, Marilog District.Â
Giila sa Marilog Police Station ang biktima mao si Jeron Manay residente sa maong lugar.
Sumala ni Salaysay Barangay Kapitan Roberto Itdang nga layo ang lugar nga gipuy-an sa maong pamilya, anaa sa 19 kilometers ang kalayo gikan sa police station, walay internet connection ug signal ug wala say kuryente.
Ang ginikanan sa biktima ang nadala sa SPMC aron mahatagan og medical nga atensyon. (Uban sa taho ni Cheche Diabordo, KAMM Media Network)
