Lalaki nga nidisko namatay human giingong tabangi og kulata niadtong Dominggo sa kaadlawon, Disyembre 31, 2023 sa Sityo Ylaya, Brgy. Taba-ao, Lungsod sa Tabogon, amihanang Sugbo.
Ang biktima giila nga si Reynan Presillas, 33, ulitawo, taga Purok Nangka sa mao nga dapit.
Samtang ang usa sa mga suspek giila nga si Joseph Lumapas, 27, ulitawo, silingan ra sab sa biktima.
Sa inisyal nga imbestigasyon sa kapulisan sa Tabogon ubos sa kamanduan ni Police Capt. Florencio Cabanlit Jr. nga pulos hubog ang biktima ug suspek ingon man ang mga kauban niini.
Matod pa nga gumikan sa ilang tumang kahubog, sila nagkainitay ug nagkalalis nga niresulta sa karambola tali sa duha ka habig.Gikataho’ng gitabangan pagkulata sa suspek ug mga kauban ang biktima.
Sa uwahing kasayuran sa Tabogon police,namatay si Presillas gumikan sa ‘traumatic head injury’ samtang nasikop sab sa hot pursuit operation si Lumapas, kinsa gitanggong sa Tabogon police. / DVQ
