Pipila ka adlaw sa dili pa ang pagsugat sa Bag-ong Tuig, subling nipagawas og kamandoan ang Police Regional Office (PRO 7) ngadto sa tanang units sa kapulisan sa Central Visayas nga ipadayon ang hugot nga monitoring sa mga pagpabuto sa armas aron sama sa Pasko, walay nabiktima sa stray bullet.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa PRO 7, nga lakip sa mando sa tanang personnel nga palapdan ang ilang pagpahibawo sa publiko nga likayan ang pagpabuto sa armas.
Kon duna may mabiktima sa saag nga bala, gimandoan ang matag city ug provincial police office director nga dakpon ang naghimo niini ug mapanubag sa iyang salaod nga nahimo.
“Gipahinumdoman na ang tanang unit commanders nga to make sure nga naa tay very wide campaign against stray bullet incidents, kining indiscriminate firing…” matod ni Pelare.
Magpadayon ang kampanya sa kapulisan batok sa kriminalidad. Gani dunay mga anti-illegal drug operation nga niresulta sa pagkasikop sa mga nalambigit sa ilegal nga drugas.
Sa tibuok Disyembre, daghan na ang nadakpan subay sa mando ni Aberin nga pugngan ang supply sa ilegal nga drugas ning holiday season.
Apil sa gipagukod mao ang mga kawatan ug tulisan.
Giseguro usab sa PRO 7 nga dunay daghang mga polis sa kadalanan nga tungod ani dunay red team gikan sa rehiyunal nga buhatan sa kapulisan nga moinspeksyon kon natuman ba sa lower units ang deployment sa ilang mga personnel.
