Usa ka high value individual (HVI) ang nasikop atol sa buy-bust sa Sityo San Antonio, Barangay Jubay, lungsod sa Liloan, alas 10:30 sa gabii, Dominggo, Oktubre 27, 2024.
Ang suspek nga nadakpan giila nga si Venerando Lubas Balaba Jr., alyas JR, 54, usa ka ex-convict, ug taga Sityo Fatima, Barangay Jubay, Liloan.
Nakuhaan sa gidudahang shabu nga 90 gramos nga gibanabana nga dunay standard drug price nga P612,000.
Ang mga ebidensya nga nasakmit gikan sa suspek naglakip sa P15 mil nga bogus money nga gipaibabwan og P1000 nga original money nga gigamit sa poseur buyer sa kapulisan, duha ka gagmay nga putos sa gituohang shabu ug laing tulo ka medium size nga pakite.
Ang buy-bust usa ka joint operation sa unit sa kapulisan ubos sa koordinasyon sa Philippine Drug Enforcement Agency (PDEA).
Ang susek mag-atubang og kasong kalapasan sa Sec. 5 ug Sec.11, sa Art. II sa R.A. 9165 o Comprehensive Dangerous Drugs Act of 2002. / DVG
