NAGMALAMPUSON ang pagsilbi og search warrant batok sa usa ka high value individual (HVI) sa Purok Malipayon Liberty, Barangay Central, Mati City, Davao Oriental niadtong Disyembre 9, 2024.
Ang maong operasyon niresulta sa pagkasakmit sa gituohang shabu nga dunay Standard Drug Price (SDP) nga P1,020,000.
Niresulta sab ang operasyon sa pagkarekober sa nagkadaiyang gidak-on sa heat-sealed transparent plastic sachets nga dunay sulod nga white crystalline nga gisuspetsahan nga shabu, drug paraphernalia, nagkadaiyang kalibre sa mga armas ug riple, FA magazine, buhing mga bala ug non-drug nga mga butang.
Ang naaresto nga suspek nga si alyas Mardy naa na karon sa kustodiya sa 2nd Davao Oriental Provincial Mobile Force Company (2nd DOPMFC), Davao Oriental Police Provincial Office (Doppo).
Mga kaso sa kalapasan sa Republic Act (RA) 9165 ug RA 10591 giandam na nga ipasaka batok sa suspek.
Gidayeg ni Police Regional Office (PRO) 11 Director Police Brigadier General Leon Victor Rosete ang kapulisan sa malampuson nga operasyon apil na ang suporta sa publiko.
Iyang gipasalig nga ang away batok sa ilegal nga druga nagpabilin nga maoy prayoridad sa kapulisan.
“Our campaign will remain unyielding as we protect our citizens and future generations from the dangers of illegal drugs,” matud pa ni Rosete. (Wenz G. Mendoza)
