Hubog nadakin-as sa foot path ulo naparok sa bato, namatay

Wa magdahom ang pamilya sa 46 anyos nga lalaki nga sa iyang pagkadakin-as mao kadto ang hinungdan sa iyang kamatayon.

Patay nang naabtan sa kabanay si Noel, ulitawo diha sa iyang barongbarong sa Purok 5, Barangay Poblacion, Dakbayan sa Danao niadtong Martes sa buntag, Agusto 27, 2024.

Ang igsuon sa namatay nga si Alicia, 60 ang personal nga mipahibawo ngadto sa Danao Police Station kalabutan sa gidangatan ni Noel.

Si Police Lieutenant Colonel Ike Ariola, misugyot ngadto sa pamilya nga ipaubos sa autopsy ang lawas ni Noel aron nga masuta kon unsay hinungdan sa iyang kamatayon.

Apan namalibad ang pamilya tungod kay kumbinsido sila nga way foul play sa ma­ong hitabo.

Adunay nakasaksi nga niadtong Lunes sa alas 5 sa hapon, Agusto 26 iyang na­kit-an ang biktima nga hubog nga nagbaktas sa dalan.

Tungod kay nakainom dili tulin ang nilaktan niini ug nadakin-as nga miresulta sa iyang pagkatumba.

Apan sa iyang pagkahagba naparok ang ulo ni Noel sa bato, gani ang iyang igsuon mao nay misapnay kay wa na makabarog.

Giuli ra sab si Noel ngadto sa iyang giistaran nga barongbarong aron nga makatarong sa pagpahuway.

Pagkasunod adlaw gihatdan og pagkaon si Noel sa iyang kabanay apan namatikdan nga nagluya ug wa magdugay nabugtoan sa iyang ginhawa. / GPL