GIPAHIBALO sa Department of Education-Davao Region (DepEd-Davao) nga ang honorarium alang sa chairman, poll clerk, ug ikatulong miyembro sa electoral board nisaka.
Gikanayon ni Jenielito “Dodong” Atillo, tigpamaba sa DepEd-Davao, nga pinaagi sa Commission on Elections (Comelec) Resolution No. 11076, ilabi na gyud sa Section 13, giulohan og Entitlement of Honoraria, Allowances, Service Credits, and Other Benefits, dunay pagtaas o kapin kun kulang P2,000 alang sa honoraria.
“I am now confirming that the chairperson of the electoral board will receive P12,000, taas na ni compared sa nilabay nga election,” butyag niya atol sa Davao Peace and Safety Security Corps, Pebrero 5, 2025, sa The Royal Mandaya Hotel.
Dugang pa ni Atillo nga mga miyembro sa electoral board makadawat og P11,000, electoral support staff makakuha og P8,000, ang DepEd supervising official makadawat og P11,000, technical support staff dunay P9,000, ug administrative support staff makakuha og P8,000.
Dugang pa niini, ang tanang teaching ug non-teaching personnel sa electoral board ug support staff makakuha og lima ka adlaw nga service credits.
Gipadayag niini nga dakong dungog alang sa mga magtutudlo ug DepEd nga gisalig ang pagbantay sa mga balota sa presinto.
Iyang gipasalamatan ang Comelec tungod sa ilang pagsalig ug kompiyansa sa mga magtutudlo.
Gisulti sab niini nga ang DepEd-Davao nangandam alang sa taliabot nga 2025 midterm local and national elections.
Matud niya nga ang departamento andam nga moserbisyo sa elections, apan wala sila masayud kung pila ka magtutudlo ang kuhaon, kay kini nga desisyon nag-agad sa Comelec.
Ang Komisyon, pinaagi sa Election Officer (EO), maoy momugna ug motudlo sa electoral board alang sa matag clustered o grouped precinct sa distrito.
Ang electoral board molusad og “Final Testing ug Sealing (FTS), voting and counting, and the transmission of election results.”
Karong tuiga, ang Comelec mogamit og Automatic Election System (AES) uban ang Automated Counting Machines (ACM) alang sa midterm election sa Mayo 12, 2025.
Karong tuiga, nagmarka sa unang Bangsamoro Autonomous Region of Muslim Mindanao (BARMM) Parliamentary Elections.
Mga botante mopili og 18,000 ka mga opisyales, apil ang 12 ka senador, 254 district representatives, 63 ka party-list representatives, ug 17,942 governors, provincial board members, mayors, ug councilors. (Rojean Grace G. Patumbon)
