Nasikop sa Estados Unidos ang founder sa Hiyas ng Pilipinas nga si Mike Sordilla o Michael Cris Traya Sordilla lakip ang national officer sa maong pageant ug partner niini nga si Bryan Navales Tarosa.
Kini human giingon nga nanglimbong kini og mga edaran nga author sa US aron biktimahon kini nga aduna’y mga publisher ug filmmakers ang ganahan nga himuon ang ilang mga libro ngadto sa salida o kaha sa TV series.
Lakip nga nadakpan si Gemma Traya Austin sa Chula Vista nga mao ang miorganisar ug rehistrado nga agent sa PageTurner, Press and Media LLC, usa ka kompanya sa Chula Vista company nga mipasangil nga usa ka negosyo sa book publishing.
Si Sordilla ug Tarosa nga parehong taga Sugbo, mao usab ang executives sa business process outsourcing nga Innocentrix Philippines.
Ang maong akusasyon sa tulo nagsugod niadtong Septiyembre 2017 hangtod Disyembre 2024.
Sa taho sa justice.gov, nasuta sa Federal Bureau of Investigation nga miabot sa 800 ang nabiktima sa maong kompanya ug nakapanglimbong og kapin $44 milyunes.
“What started with the promise of a Hollywood dream turned into a devastating nightmare for victims,” matod ni U.S. Attorney Tara McGrath, sa press release sa US DOJ.
Nadakpan si Sordilla ug Tarosa niadtong Disyembre 9 sa San Diego samtang Disyembre 12 sab napusasan si Austin sa Chula Vista.
Kasong conspiracy to commit mail and wire fraud ug money laundering conspiracy ang kaso nga giatubang sa tulo. (HBL with PR)
