Ipahigayon karong adlawa, Miyerkules, Agusto 14, 2024, ang giandam sa Malacañang nga heroes’ welcome parade alang sa atletang mga Pinoy nga ningkombati sa bag-uhay lang nahuman nga Paris Olympics.
Ang parada, nga adunay 7.7 ka kilometros nga gilay-on, manukad sa Aliw Theater sa Pasay City ug mahuman kini sa Rizal Memorial Sports Complex sa Malate, Manila.
Kon wala’y kausaban nga nahitabo, si two-time Olympic champion Carlos Yulo ug ang ubang Filipino Olympians nahibalik na gikan sa Paris kagahapon, Martes,. Agusto, 13, sa alas 6:00 sa gabii.
Adunay panihapon ug awarding ceremony nga giandam ang Malacañang alang sa mga atleta.
Si Reichel Quiñones, Chief of Presidential Protocol ug Presidential Assistant on Foreign Affairs, nianunsyo nang daan nga adunay cash incentives nga ihatag si President Bongbong Marcos sa mga atleta apan ning pagsuwat, wala pa gibutyag ang kantidad.
Sa Paris Games, ang Pilipinas nakahakot og duha ka gold medals ug duha sab ka bronze medals nga nagpahiluna sa nasod sa ika-37 sa medal standing, labing taas sa Southeast Asia.
Naghatag sa duha ka gold medals mao si Yulo sa gymnastics samtang ang nagtunol sa bronze medals mao sila si Nesthy Petecio ug Aira Villegas sa women’s boxing.
Sa kinatibuk-an, ang Pilipinas adunay 22 ka mga atleta nga ningkombati sa Paris Games.
Gawas sa nahisgutang medal winners, ang ubang mga atleta sa Pilipinas mao sila si Eumir Marcial, Carlo Paalam, ug Hergie Bacyadan sa boxing, pole vaulter EJ Obiena, rower Joanie Delgaco, hurdlers Lauren Hoffman ug John Cabang Tolentino, swimmers Kayla Sanchez ug Jarrod Hatch, Samantha Catantan sa fencing, Emma Malabuyo, Aleah Finnegan ug Levi Ruiviva sa gymnastics, Bianca Pagdanganan ug Dottie Ardina sa golf, Kiyomi Watanabe sa judo, Elreen Ando, John Ceniza ug Vanessa Sarno sa weightlifting. / ESL
