Wala na maabti og buntag ang 34 anyos nga lalaki human gipusil-patay samtang nahinanok sa pagkatulog sulod sa iyang balay sa Sityo Kahuyan Alaska, Barangay Mambaling, Dakbayan sa Sugbo, Huwebes sa alas 3:40 sa kaadlawon, Agusto 22, 2024.
Ang biktima giila nga si Gilbert Salcedo Gelbolingo, ex-convict, residente sa maong lugar ug graduwado sa kursong Criminology sa usa ka unibersidad sa Siyudad sa Sugbo.
Matod sa uyoan sa biktima, kanhi seaman ug maoy nagpa eskuwela niini, ang nakadungog og duha ka buto sa armas atol sa iyang pagpangihi.
Ang maong butobuto nga nagagikan sa atbang nga balay sa maong saksi diin natulog ang iyang pag umangkon.
Igo nalang nakita sa maong uyoan nga adunay tawo nga dali nga migawas sa balay sa biktima nga gituohan nga maoy mipusil sa biktima.
“Pagkadungog nako sa duha ka buto milili ko sa bintana nakakita kog tawo nga midagan wala nako maklaro kay ngitngit man gud, among gitan-aw didto sa sulod ako gyung pag umangkon giigo sa ulo,” matod sa uyoan.
Nakaangkon ug samad sa agtang ang biktima ug sa ubang bahin sa lawas niini nga maoy hinungdan sa iyang hinanali nga kamatayon.
Gituohan sa kapulisan nga gidul-itan kini sa pagpusil kay dunay sunog sa pulbura ang panit niini.
Ang suspetsado gihulagway nga nagsul-ob og sweatshirt ug short pants nga daling midagan paingon sa seawall sa Barangay Duljo Fatima, dakbayan sa Sugbo.
Iyang gitug-an nga nagdako sa apohan ang biktima ug nadakpan na kaniadto sa kaso sa ilegal nga drugas apan sa paggawas niini nibalik sa iyang naandan nga bisyo.
NAKA-UTANG?
Tungod niini nagtuo ang uyoan nga ang naghimo sa krimen mao kadtong mga tirador sa mga drug pusher.
“Ang akung gidudahan ani assassin sa druga gyud, naka utang siguro ni, mailhan man nato ang mga assassin sa druga kay mga hingigo man kayo,” matod sa uyoan.
Si Police Major Efren Diaz Jr ang hepe sa Mambaling police station niingon nga base sa ilang nakuha nga kasayuran dunay dakong utang ang biktima sa usa ka drug personality.
Nagpadayon pa ang ilang imbestigasyon ug pag ila sa duha ka mga suspetsado subay sa mga kuha sa CCTV camera sa dapit.
“Dakog batal sa drugs, daghan pud na recover nga paraphernalia ganina,” matod ni Police Major Diaz Jr.
Nakig alayon ang Mambaling police station sa mga kaila sa biktima ug sa ubang residente aron mokuhag kasayuran sa kabahin sa pagkatawo ni Gelbolingo. /
