Mga duwa karon:
5:00 pm- Terrafirma batok San Miguel
7:30 pm- Ginebra batok Phoenix
Suwayan pagposte sa Brgy. Ginebra Gin Kings ang ikaduha nilang sunodsunod nga kadaugan sa samang gidaghanon nga mga duwa sa ilang pagpakigbatok sa Phoenix Fuel Masters sa main game karong Biyernes sa gabii, Disyembre 13, 2024, sa Philippine Basketball Association (PBA) Season 49 Commissioner’s Cup sa Ninoy Aquino Stadium.
Ang Gin Kings nabunyagan og daog batok sa NLEX Road Warriors, 109-100, niadtong Miyerkules, Disyembre 11.
Ning maong duwa, nakatabang og dako ang bag-ong nakuha nga pambato sa Gin Kings nga si Troy Rosario sa nagkadaiyang mga departamento.
“He (Rosario) gets everybody back to comfortable positions. Troy coming in and playing the 4 and 3 positions allows Justin (Brownlee) on the opposite side and takes off some of the load in rebounding,” matod ni Ginebra coach Tim Cone.
Nahisgutan sab ni Cone nga sa pag-abot ni Rosario, nahibalik si Stephen Holt sa guard position diin mas komportable kining moduwa.
Tuod man, nagpaulbo og 26 puntos si Holt aron pangulohan ang labing unang daog sa Gin Kings.
Batok sa Fuel Masters, nga wa pa’y daog sulod sa tulo ka mga duwa, tataw nga inilog ang Gin Kings.
Apan angayang hunahunaon sa Gin Kings nga pulos sikit ang pagkapilde sa Fuel Masters sa duha sa ilang mga duwa batok sa lig-ong puwersa sa Meralco Bolts, 109-111, ug defending champions San Miguel Beermen, 104-107.
Sa premirong duwa, makigbatok ang Beermen sa Terrafirma Dyip sugod sa alas 5:00 sa hapon.
Ang Beermen adunay 2-1 nga rekord samtang ang Dyip wa pa’y daog sulod sa upat ka mga duwa. / ESL
