NAKAKUHA ng momentum ang FPJ Panday Bayanihan Partylist sa pangunguna ni Brian Poe Llmanzares sa darating na 2025 midterm election matapos makapasok sa magandang posisyon sa isinagawang survey ng Social Weather Station (SWS).
Ang partylist ay nakakuha ng 1.73 porsyentong pagtaas sa ika-11 na puwesto sa pinakahuling SWS survey ngayong Disyembre.
Ang FPJ Panday Bayanihan Partylist ay nakatuon sa mga haligi ng pagkain, progreso, at hustisya, na naglalayong iangat ang mga marginalized na Pilipino at itaguyod ang isang inklusibo at sustainable na kinabukasan para sa bansa.
“Pinasasalamatan namin ang publiko sa pagkilala sa serbisyong tatak FPJ. Ang FPJ Panday Bayanihan ay patuloy na isusulong ang mga polisiyang mas inklusibo para sa lahat ng Pilipino,” ani Brian Poe, unang nominado ng Partylist.
“Karapat-dapat sa mas magandang buhay ang bawat Pilipino na makakamit lamang kapag may seguridad sa pagkain, sustainable na progreso, at mabilis na hustisya,” dagdag pa ni Poe.
Ang bisyon ng partylist ay malalim na nakaugat sa tradisyong Pilipino ng bayanihan—pagkakaisa at pagtutulungan ng komunidad. Ang terminong panday ay inspirasyon mula sa tinitingalang panday na karakter ni Fernando Poe Jr. at sumasalamin sa misyon ng partido na hubugin ang mas magandang kinabukasan para sa mga Pilipino at buuin ang mas matatag at makatarungang lipunan.
