Gipangbasa sa kapulisan sa Dakbayan sa Sugbo ang mga ilegal nga mga gamit alang sa fireworks ug firecrackers nga ilang nasakmit sa wala pa ang bag-ong tuig sa Barangay Talamban, Martes sa buntag, Enero 7, 2025, sa gawas sa Camp Sotero Cabahug sa dalan Gorordo, Barangay Kamputhaw, Cebu City.
Nangulo sa pagguba sa maong mga pabuto ang Deputy City Director for Operations sa Cebu City Police Office (CCPO) P/Lt. Col. Maria Theresa Macatangay.
Ang mga ilegal nga mga pabuto nga nasakmit sa kapulisan naglangkob sa Pagoda, Cinderalla, Fountain, Jumbo, Mercury, Romand Candle, Araw, Piccolo, Pop-Pop, Sparklers (Binggala), Thunder ug Beauty nga mobalor ang tanan sa P34,200.
Matod ni Macatangay, ang maong gamit sa fireworks ug firecrackers gibaligya sa dili designated display area nga mao ra ang South Road Propety (SRP).
Una na nga mibahad ang mga sakop sa Regional Civil Security Unit (RCSU) 7 nga ilang dakpon kadtong mamaligya og firecrackers ug fireworks sa dili designated area.
Hugot nga nagmonitor ang kapulisan labot niini nga maoy hinungdan nga ilang gipangsakmit ang ilang makita nga gipamaligya sa kadalanan.
LAPU-LAPU
Kapin sa P26,00 nga kantidad sa mga nasakmit nga pabuto sa Dakbayan sa Lapu-Lapu ang giguba sa mga awtoridad niadtong Martes, Enero 7, 2025, luyo sa Lapu-Lapu City Police Office (LCPO) building.
Ang ‘ceremonial disposal’ sa mga nakumpiska nga pabuto gipahigayon sa LCPO pinangulohan ni Acting City Director Police Coronel Dyan Agustin uban sa mga personahe sa Bureau of Fire and Protection, City Environmental and Natural Resources Office, ug sa City Health Office.
Matod ni Agustin, ang maong inisyatiba kabahin sa dungan nga pagguba sa mga nasakmit nga pabuto sa dakbayan.
Dugang pa niya nga ang mga nakumpiska nga mga butang nga gipakita sa dili awtorisado nga mga lugar naglakip sa gidili nga mga pabuto sama sa piccolo ug uban pang imported nga produkto nga dili itugot sa Pilipinas./ AYB / DPC
