Na-dismiss nga si Mandaue City Mayor Jonas Cortes nipasaka og petisyon sa Supreme Court (SC) nga naghagit sa Commission on Elections (Comelec) Resolution 1104-A.
Ang petisyon gipasaka niadtong Oktubre 9, 2024, alang sa certiorari, prohibition, ug injunction nga naghangyo sa korte sa pag-isyo og temporary restraining order (TRO) o writ of preliminary injunction sa paghunong sa pagpatuman sa resolusyon diin nagmando sa pagkanselar sa certificate of candidacy (COC) ni Cortes.
Sa petisyon ni Cortes nagtumbok ni Comelec Chairman George Erwin Garcia ug ubang commissioners isip respondents human iyang gikuwestiyon ang constitutionality sa resolusyon.
Ang tumong ni Cortes nga masanta ang pagpaepekto sa resoluyon samtang ang korte nag-review sa maong kaso.
Kini nga legal nga lakang gihimo human sa bag-ong gipakanaog sa Ombudsman sa pagtaktak ni Cortes sa katungdanan tungod sa kasong ‘grave misconduct’ kabahin sa operasyon sa usa ka batching plant nga way insaktong permiso.
Dili pa lang usab dugay, una nga gisuspenso siya sulod sa usa ka tuig tungod sa giingong pag-abuso sa gahom sa pagtudlo og usa ka hepe sa social welfare services nga giingong dili kuwalipikado.
Ug ang maong samang legal nga remedyo unang gihimo sa nataktak usab nga mayor sa Dakbayan sa Sugbo nga si Michael Rama tungod sa kasong nepotismo sa pagpatrabaho sa iyang duha ka mga bayaw sa City Hall.
Si Rama una nang gipaubos sa preventive suspension tungod sa reklamo sa upat ka mga kawani sa City Hall nga ‘grave abuse of authority.’
Ang duha ka mga piniling mayor sa managsilingang dakbayan sa Metro Cebu dunay managsama nga sitwasyon ug pareho usab nga ning-file og COC nga magpasubli sa pagpapili sa samang posisyon sa midterm elections sa Mayo 2025.
Pastilan, talagsaon sa kasaysayan sa pulitika sa Sugbo. Naa na karon sa tukmang hawanan ang petisyon sa depensa o mga hingtungdan.
Manghinaot na lang kita sa paspas nga pagligid sa hustisya aron pagtapos sa isyu nga dunay lama sa pulitika.
