NAGPATUNGA na ang puwersa sa 603rd Infantry Brigade, Philippine Army sa mga nag-away nga duha ka grupo sa Moro Islamic Liberation Front (MILF) sa Palimbang, Sultan Kudarat Province aron mahilot o kaha makakita og solusyon sa ilang wala pagsinabtanay.
Sumala kang Brigade Commander Brigadier General Michael Santos nga nangulo sa tigum alang sa panagsabot, gipahigayon sa Tagadtal Integrated School Gymnasium sa Barangay Colube, Palimbang niadtong Martes, Agosto 13, 2024.
Tungod niini, nasulbad ang dugay na nga panagbangi tali sa grupo ni Brigade Commander Esmael Mike Binago ug Kumander Bonde Abo Abdullah nga Battalion Commander sa MILF.
Gipasidan-an ni Santos ang nagkaaway nga sakop sa MILF nga walay programa sa gobyerno nga moabot kanila kon magpadayon ang ilang pinatyanay.
Ang peace dialogue gitambongan usab sa mga lokal nga opisyal ug kapulisan sa Sultan Kudarat Province.
Kahinumdoman nga dugay na nga nagka-engkuwentro ang duha ka lider sa MILF diin daghanan na ang napatay ug naangol.
Apan nipasalig na ang duha ka grupo nga suportahan ang gipursige nga kalinaw sa militar ug sa gobyerno. (EEF)
