Dul-an sa duha ka milyon ka pesos nga balor sa ilegal nga drugas ang nasakmit sa Police Regional Office (PRO) 7 sa managlahi nga anti-illegal drug operations.
Unang operation gihimo sa mga sakop sa Regional Police Drug Enforcement Unit 7, alas 9:42 sa gabii, Huwebes, Nobiyembre 21, 2024 sa Saint Jude Street, Barangay Bulacao.
Ang suspek giila nga si King Montillano Palma alyas Kiana, 26, taga Purok Eto, Sitio Salvador, Barangay Tangke, Siyudad sa Talisay. Nakuha gikan sa suspek ang 200 gramos nga gituohang shabu nga dunay standard drug price nga P1,360,000.
Pagka alas 12:10 sa kaadlawon, Biyernes, Nobiyembre 22, 2024, laing nadakpan sa buy-bust sa City Intelligence Unit sa Cebu City Police Office sa Sitio Riverside Englis, Barangay Guadalupe.
Ang nadakpan giila nga si Ronelo Angaon Bacalan, 44, alyas Kagot, molupyo sa maong lugar. Nakuha gikan sa suspek ang binulto nga gituohang shabu nga motimbang sa 75 grams nga dunay standard drug price nga P510,000.
Gipangposasan sa personnel sa Port Police ang porter ug laborer sa Pier 2, Barangay San Roque, pasado alas 10 sa buntag, Biyernes, Nobiyembre 22, nakuhaan og drugas ug armas atol sa saturation drive sa Cebu Port Authority.
Nadakpan silang Wendell Calero, porter, ug taga Arellano Blvd., San Roque ug Jonel Henolos, 35, laborer, ug taga Brgy. Cantabaco. Nakuhaan og drugas nga balor P60,000 ug kalibre .45 nga armas. / AYB
