Dul-an sa usa ka milyon ka pesos nga balor sa illegal nga drugas ang nasakmit sa kapulisan sa Central Visayas sa duha ka adlaw nga anti-criminality operation gikan sa alas 6 sa buntag sa Sabado, Nobiyembre 2, ug natapos sa alas 5:59 sa buntag sa Dominggo, Nobiyembre 3, 2024.
Sumala sa Police Regional Office (PRO) 7 nakasakmit ang kapulisan og 104.43 gramos nga shabu nga dunay standard drug price nga P710,556 sa 51 ka operations.
Nakasikop usab sila og 20 ka wanted persons nga dunay nagkalainlaing kaso nga giatubang sa korte ug duha niini giila nga most wanted persons.
Sa kampanya batok illegal gambling, ang kapulisan nakasikop og 76 ka mga sugarol sa 37 ka anti-illegal gambling operations ug pagka imbargo sa P6,505 nga kwarta sa sugal.
Wala usab sila molugak sa ilang kampanya batok loose firearms subay sa ilang subsob nga pagpangandam sa nagsingabot nga midterm elections sa sunod tuig nga niresulta sa pagkasakmit sa 18 ka nagkalain-aing kalibre sa armas ug pito ang nadakpan.
Sa pagpatuman sa mga lokal nga ordinansa sa mga siyudad ug lungsod sa tibuok rehiyon 7, nakaisyo ang kapulisan og citation tickets og 1,333 ka mga tawo ug moabot sa P526,700.00 ang multa.
NANGOMPRA
Usa ka taga Barangay Quiot, dakbayan sa Sugbo nga nangompra og shabu sa A. Lopez atol sa adlaw sa mga kalag, nadakpan sa gilusad nga buy-bust sa Labangon Police Station, alas 8:28 sa gabii, Sabado, Nobiyembre 2, 2024 sa Sitio A. Lopez, Labangon sa dakbayan sa Sugbo.
Ang naposasan sa mga polis ug nabalhog sa Labangon Police Station giila nga si Jerald Rabaga Radaza, 51, residente sa dan Sabellano, Sitio Greenbelt, Barangay Quiot.
Nakuha gikan sa suspek ang mga pinakete sa gituohang shabu nga motimbang sa 10.2 gramos nga dunay standard drug price nga P69,360.
Matod ni Police Major Eraño Regidor, hepe sa Labangon Police Station nga si Radaza na-report sa barangay nga nalambigit sa pagpamaligya sa illegal nga drugas hinungdan nga ang gipaubos sa monitoring. / AYB
