PATAY ang usa ka driver human madisgrasya ug naapil pagkasunog dihang ni-ulbo ang gimanehong motorsiklo niini atol sa nahitabong disgrasya sa Barangay Tinaan, Dakbayan sa Naga kagabii, Sabado, Nobiyembre 30, 2024.
Nailhan ang biktima nga si Genolito Ramerez Ib-Ib, 52 anyos.
Base sa inisyal nga imbestigasyon sa kapulisan, gikan sa Lungsod sa San Fernando ang biktima kinsa paingon na mopauli sa Dakabayan sa Sugbo.
Apan dihang naabot na kini sa Barangay Tinaan, gikataho nga niagi ang biktima sa laing lane hinungdan nga gikasugat niini ang usa ka wing van paingon sa habagatang Sugbo nga miresulta sa head-on collision.
Gimaneho ang wing van ni Teodoro Matillano III, 49 anyos.
Nunot sa kakusog sa impact, nibuto ug nasunog ang motorsiklo sa biktima.
Gisuwayan pa pagdala sa tambalanan ang biktima, apan gideklara na kining dead on arrival samtang ang driver sa van anaa na sa kustodiya sa kapulisan. (DVG)
