Nia ang mga Filipino celebrity ug ang mga natala nilang rekord sa marathon nga tipik na sa kultura sa showbiz. Kay gawas nga makaayo sa physical ug mental health, makapataas pa sa kinabuhi.
KIM CHIU
Usa sa mga aktibo karon sa running ang Chinita Princess nga matod niya, “The more I run, the more I love my body.”
Si Kim nibutyag nga sukad siya nidagan ug niapil sa mga marathon nawala ang iyang asthma attack ug dili na siya dali kutasan labi na kon mosayaw.
Ang It’s Showtime co-host ang usa sa mga official finisher sa 34-kilometer New Clark City Duathlon. / INSTAGRAM
KIM ATIENZA
Ang pagka-stroke ni Kuya Kim niadtong 2010 ug pagka-diagnosed niya og Gullain-Barre Syndrome niadtong 2013 ang nahimong instrumento sa iyang pagdagan isip therapy.
Karon si Kuya Kim dili lang sikat nga TV host kundi inspirasyon pa isip triathlete ug fitness advocate sa showbiz.
Ang iyang personal record nakuha sa 2017 Boston Marathon diin natapos niya ang 42.47 kilometers sulod lang sa 3 ka oras ug 57 minutos. / INSTAGRAM
ANNE CURTIS
Tipik na usab sa lifestyle ni Anne Curtis ang running nga maoy naghatag niya og taas nga lahutay sa edad nga 39.
Ang It’s Showtime host nimugna og personal record nga 4 hours ug 56 minutes atol sa 42-kilometer run sa New York Marathon.
Ang iyang pagdagan dili lang sa iyang kaugalingon apan fund raising niya isip official ambassadress sa Unicef. / INSTAGRAM
RHIAN UG SAM
Luyo sa mga intriga, ang real-life couple nga Rhian Ramos ug Sam Verzosa ang official finishers sa bag-o lang nahuman nga 42 kilometers run sa 2024 New York City Marathon.
Sila ang katapusang batch sa mga runner nga nidagan alas 11:30 sa buntag nga natapos nila mga alas 7 na sa gabii. Gipakita ni Rhian ug Sam ang ilang commitment sa `health and fitness’ pinaagi sa pagdagan ug sa samang higayon fund raising nila sa Smile Train Philippines. / INSTAGRAM
MATTEO UG SARAH
Sama sa iyang bana, si Sarah Geronimo nag-training usab karon sa marathon. Proud nga gipaambit ni Matteo Guidicelli ang personal record sa iyang misis nga 35 minutos atol sa 6-kilometer race niini sa Panglao, Bohol.
Hinuon, wala moapil si Sarah sa actual competition sa Sun Life Triathlon niadtong Hulyo sa Panglao diin silang Matteo ug Piolo Pascual ang third placer sa relay category. / INSTAGRAM
VLADIMIR ROY
(with Japanese female runner Yuki Masuda)
Gawas nga `fitness buff’, si Vladimir Roy Villena ang founder sa “Gaia” nga kapila na nidaug sa SunStar’s Best of Cebu isip Best Vegan Food. Niadtong Nobiyembre 3, si Vladimir nidagan sa 42-kilometer full marathon sa Hanoi, Vietnam nga iyang nahuman sa 5 ka oras ug 27 minutos.
Naka-selfie usab niya sa Hanoi ang Kapuso actor-politician nga si Alfred Vargas ug ang Japanese runner nga si Yuki Masuda. / FACEBOOK
