Gidasmagan sa NLEX Road Warriors ang San Miguel Beermen sa overtime, 112-108, sa Philippine Basketball Association (PBA) Governor’s Cup didto sa Aquilino Pimentel International Convention Center, Cagayan De Oro City, Sabado sa gabii, Agusto 31.
Ang import sa Road Warriors nga si Myke Henry mihatag sa iyang naandan nga all-around performance. Mitali kini og 33 puntos, unom ka rebounds, upat ka assists, duha ka steals ug duha ka blocks.
Samtang si Robert Bolick mikamada og 20 puntos lakip na ang duha ka crucial free throws nga mihatag og upat ka puntos nga labaw sa NLEX sa nahabiling 13.8 segundos sa overtime.
Apan ang nahimong yawe sa NLEX alang sa kadaogan mao ang gipakita nga kombati sa ilang role players nga si Mike Miranda, Jhan Nermal, Richie Rodger ug Robbier Herndon.
Si Miranda nakapasulod og duha ka tres ug usa ka four-point shot sa fourth quarter aron madala ang iskor sa 98-93 sa nabiling 1:29 sa regulation.
Samtang si Nermal miarangkada sa OT pinaagi sa clutch three-point play gikan sa foul ni Marcio Lassiter.
Si Rodger mibuhat og duha ka layups ug si Herndon mipabuhagay og yanong tres aron ihatag sa NLEX ang 110-106 nga labaw sa 28.2 segundos sa OT.
Napaubos sa Beermen ang biya sa dos puntos human sa shot ni June Mar Fajardo apan mibalos og duha ka free throw si Bolick nga mao nay misilyo sa kadaogan sa NLEX.
Misaka ang NLEX ngadto sa 3-1 (win-loss) nga kartada.
Ang Beermen, nga nakakuha og 36 puntos kang Jordan Adams, 29 puntos ka CJ Perez, 19 puntos kang Fajardo, nahagsa ngadto sa 2-2.
Puntos matag-usa:
NLEX (112) – Henry, 33; Bolick, 20; Miranda 17, Policarpio, 12; Nermal, 10; Herndon, 10; Rodger, 6; Fajardo, 2; ug Amer 2.
San Miguel (108) – Adams, 36; Perez, 29; Fajardo, 19; Romeo, 6; Trollano, 5; Ross, 4; Lassiter, 3; Rosales, 3; Manuel, 2; ug Tautuaa, 1. / RSC
