Day kinahanglan gyud mong mag-abot sa kalibonan.
Ug didto, magdungan mo og pungko
samtang gaiyahay og bitbit sa bulsetang
mas nailhang BH agi sa kumbirang gihapit.
Samtang gapungko, paspas, hinay… paspas hinay… paspas na kaayo ang inyong pagkumpas dugkal sa yutang gabugol
gamit ang habol, hinulaman, ug way puloang mga guna sa manghilotay nga si Nang Syana.
Sa durong handus-kandos ninyo sa daghang mga bagal, wala na gyod nimo kapugngi ang pagbuswak ug pagdahili sa init-init ug basa-basang dalit. Nihunong ka sa makadiyot.
Galingi-lingi kay basig
naay irong buang moambit sa grasyang dili mo buot ipaambit. Naglapiti ang bag-o, dalag, ug binurdahan mong panti nga So-En regalo ni Auntie Fe pagbirthday.
Nihural na lamang ikaw ug niudang sa imong pagdugkal sa bagal nga mao untay mosalod ug mosapupo sa gaaso ug gabukal pa nimong champorado.
Gihinay-hinay nimo pagwahing ang nipis nga panapton nga maoy nagkumkom sa gagimok-gimok mong mga bituon. Nihangad ka sa langit.
Nihanggab sa gasagol nga lab-as ug bahong patay nga hangin. Ug sa imong pagpiyong, giduyogan mo kini sa makadani mong pahiyom.
Dayag sa imong panagway ang pagpangaliyupo. Sa katapusang higayon, imong gibuhian ug gibutang sa kiliran ang gikuptang bulseta ug hinagiban.
Daw sama sa usa ka banog nga padulong ng molupad— ikaw nanukad.
Tanan nimong kahingawa ug kabalaka, kaguol ug kahadlok,
kasakit ug kapait, dungan sa imong pagpiyait, panapos
mong gipabugwak ang gaumidong igit.
