Magbinukbokay na sila si Rhonvex Capuloy ug Jason Tinampay karong gabii aron ilugan ang bakanteng World Boxing Foundation (WBF) Australasian super featherweight belt sa main event of Big Yellow Boxing Promotions “Bakbakan Uno” karong Martes sa gabii, Disyembre 10, 2024, sa Conequip Philippines sa reclamation area sa Mandaue City.
Si Capuloy kinsa usa sa pambatong mga boksidor sa Big Yellow, gilaumang makasugat og grabing binukbokay batok sa beteranong si Tinampay nga taga Dagohoy, Bohol.
Matod ni head coach Christopher “Ping-Ping” Tepora nga adunay dakong plano ang tag-iya sa Big Yellow nga si Seth Oliver Tio kang Capuloy kon modaog siya ning awaya.
Si Capuloy naggunit og 11-3-3, 8KOs nga rekord samtang si Tinampay adunay 14-19-2, 11KOs nga baraha.
Sa undercard, magsinumbagay sila si Reycar Auxilio (6-4-1, 5 KOs) batok Jess Rhey Waminal (16-11-1, 9 KOs), Jusue Bastillada (8-1, 5 KOs) batok Paolo Fortun (3-1, 1 KO), Arlando Senoc (3-0, 2 KOs) batok George Sedillo (2-2-3), John Rey Labajo (3-2-1, 3 KOs) batok Dixson Ercillo (2-3, 1 KO), Taiwanese Ming Hung Lee (9-1, 6 KOs) batok Kim Lindog (8-19-1, 5 KOs), Mark Anthony Sarino (2-1, 1 KO) batok Norman Rusiana (1-6-2), ug Emje Felicilda (2-0) batok Ronie Urgel (0-1). / EKA
