GENERAL SANTOS CITY — Pasakaan og kaso nga Illegal Possession of Firearms o kalapsan sa Republic Act 10591 ang babaye nga nadakpan nga nagdala og armas alas 4:45 sa hapon, Dominggo, Disyembre 22, 2024, sa probinsiya sa Sultan Kudarat.
Giila ang suspek nga si alyas Lyn, 33-anyos, sekyu, ug nagpuyo sa President Quirino, Sultan Kudarat.
Nasayran nga samtang nagpahigayon og checkpoint operations ang mga personahe sa President Quirino Municipal Police Station ug 1st Sultan Kudarat Provincial Mobile Force Company (SKPMFC) sa Barangay Pedtubo, usa (1) ka Yamaha Aerox 155, kolor itom, nga gimaneho sa babaye ang gipahunong alang sa inspeksiyon.
Dihang niduol ang nga pulis, nideklarar kini nga security guard siya ug duna siyay pusil sa iyang pack bag.
Gipangutana siya sa mga pulis kon duna ba siyay legal nga dokumento sa maong mga armas apan napakyas siya sa pagpakita.
Busa ang babaye gidakop ug gipahibalo sa iyang mga katungod sa Konstitusyon kalabot sa doktrina sa Miranda.
Nakuha gikan sa babaye ang usa ka unit .38 revolver nga adunay serial number P1073046 nga walay mga bala.
Balhog sa prisohan sa kapulisan ang suspek ug gitakda nga pasakaan og tukmang kaso. (Edgar E. Fuerzas)
