Gikan namista ang upat ka mga boardmate sakay sa awto ang nakasugat og disgrasya sa kadalanan sa Boundary Tajao, Lungsod sa Pinamungajan, Cebu sa alas 3:29 sa kadlawon, Sabado, Oktubre 12, 2024.
Wa na mahitsura ang Toyota Wigo sa dihang misungag sa ilang gikasugat nga Isuzu Prime Mover truck.
Ang tulo sa upat ka mga sakay sa awto (Toyota Wigo) ang namatay gumikan sa kakusog sa impact nga miresulta sa grabeng kadaot sa ilang kalawasan.
Dead on the spot ang drayber sa awto nga si Jayden Raydel Booc, 20, tinun-an sa kursong Aeronautics, taga Barangay Tubod, Toledo City nga misudlot na ang katunga sa iyang lawas sa windshield.
Samtang ang iyang pasahero nga si Stephen Sabornino, 18, taga Ormoc City ang gideklarar nga dead on arrival sa dihang gidala sa ospital.
Ang ikatulo nga pasahero nga si Jade Engle, 22, taga Tacloban, Leyte ang wa magdugay ang nabugtoan sab sa iyang ginhawa samtang gisuwayan og tabang sa tambalanan.
Padayon pa nga gitabang ang ikaupat nga biktima nga si Rev Luther Alolo, 19, taga Lila, Bohol.
Base sa inisyal nga imbestigasyon sa Pinamungajan Police Station ang mga biktima giingong gikan pa sa Toledo namista nga gikatahong naka-inom og ilimnong makahubog, ug paingon sa Pinamungajan.
Sa pakighinabi sa amahan ni Booc nga nananghid ang iyang anak nga mamista sa Tubod, Toledo, nga bag-uhay nga miuli gikan sa Dakbayan sa Sugbo kuyog sa iyang mga ka-boardmate.
Human namista mopaingon ang grupo sa Pinamungajan diin nagpuyo ang uyab ni Booc.
Ang drayber sa trak nga si Diomar Bugna, 39 taga Cabitoonan, Toledo City miasoy nga padulong sa Dakbayan sa Sugbo aron nga mohakot og feeds diin iyang nasugatan ang awto nga giingong migawas sa ilang lane ug misungag sa trak nga miresulta sa head on collision. / Dugang taho ni GPL
