Opisyal na nga nagkasinabot ang duha ka boxing pound-for-pound superstars nga sila si Mexican Saul Canelo Alvarez ug American Terence Crawford nga magbinukbokay sila karong Septiyembre 13, 2025, sa T-Mobile Arena sa Las Vegas, Nevada.
Gianunsyo na kining maong makasaysayong away sa ninglabay nga pipila ka mga semana apan karon lang nasayran nga nakapirma na og kontrata ang duha ka dekalidad nga mga boksidor basi sa taho sa Ring Magazine ug MSN.
Sulod sab sa duha ka tuig ang gihuwat sa boxing fans una nalansang sa bato kining maong gikahinamang engkuwentro.
Si Alvarez nidominar sa nagkadaiyang weight divisions gikan sa middleweight hangtod na sa light heavyweight diin lakip sa iyang gipangbiktima ang dekalidad nga mga boksidor sama nila ni Gennadiy Golovkin, Sergey Kovalev, ug Billy Joe Saunders.
Sa iyang bahin, si Crawford nanghawod sa mas gaan nga timbang gikan sa lightweight hangtod na sa super welterweight.
Si Alvarez adunay 60-2-2, 39KOs nga rekord samtang si Crawford adunay 41-0, 31KOs nga baraha. / ESL
