Gi-withdraw sa APO Land and Quarry Corporation (ALQC) ang ilang petition for Injunction and Temporary Restraining Order (TRO) batok sa ‘cease-and-desist order’ sa Kagamhanan sa Probinsiya sa Sugbo human sa taas nga pagpadayag ni Cebu Gov. Gwendolyn Garcia atol sa hearing sa Miyerkules, Disyembre 11, 2024.
Ang ALQC nipetisyon niadtong Lunes atubangan sa Regional Trial Court Branch 9 sa Cebu City sa Writ of Preliminary Mandatory Injunction ug TRO sulod sa 20 ka adlaw niadtong Disyembre 6, 2024, batok sa Executive Order No. 22 ni Garcia nga nagmando sa paghunong sa tanang “earth-moving operations” sulod sa tanang Mineral Production Sharing Agreement (MPSA) nga mga dapit sa City of Naga sulod sa usa ka bulan, sugod sa Disyembre 3.
Si Garcia sa pakighinabi sa mga tigbalita human sa hearing sa lobby area sa RTC Cebu City sa Qimonda Building, ang Injunction ug TRO nga gipetisyon sa cement firm usa ka pagpakita og “bad-faith.”
Matod sa Gobernador, gitakda na niyang tigom niadtong Miyerkules sa hapon uban sa ang executive management sa Apoland ug Cemex uban sa regional director sa Department of Environment and Natural Resources (DENR) 7, Environmental Management Bureau (EMB) 7, ug Mines and Geoscience Bureau (MGB) 7.
Matod ni Garcia nga gipasabot nga ang tigom mao ang paghisgot sa mga “paagi” kon unsaon ang pagpadayon sa quarry nga nagkonsiderar sa kaluwasan sa kapin sa 1,000 komunidad nga nagpuyo sulod sa lokasyon sa quarrying sa kompanya sa Naga.
“Kinsa pa man diay laing mubarog nila nga wala man sila’y influence intawon, mga pobre tawon sila. Pero og dili ko motingog they will run the constant risk of having another Naga tragedy,” matod ni Garcia.
“I do not know what happened to them, but the counsel said they were instructed by the management to withdraw. And it’s good that they have withdrawn but the judge has ruled that the case is dismissed,” dason niya.
“All we wanted was to create a buffer zone. The MGB, from the previous administration not the current one, issued MPSA at the areas where there are already a lot of residents,” dugang ni Garcia.
“That MPSA gave a blanket authority for Apoland to quarry anywhere.”
Ubos sa MPSA, gitugotan sa gobiyerno ang mga operator sa pagmina sa pagsuhid, pagpalambo ug paggamit sa mga kahinguhaan sa mineral bugti sa bahin sa kita.
Human sa hearing, nibalik si Garcia sa Cebu Capitol building aron makigtagbo sa management sa cement manufacturing firm uban sa diskusyon nga nakasentro sa massive quarrying activities sa Naga.
HEARING
Atol sa pagdungog niadtong Miyerkules, si Garcia nihimo og 25 minutos nga pagpadayag atubangan sa presiding Judge Alexander Acosta nga nagdetalye sa iyang mga rason sa temporaryong cease-and-desist order nga nagtumbok sa kaluwasan sa mga lumulupyo ug mga residente duol sa operasyon sa ALQC.
Si Garcia niingon nga kini maoy paghimo sa environmental audit sa operasyon sa kompanya aron malikayan ang laing landslide niadtong 2018 sa Naga City sa Barangay Tinaan, sulod sa MPSA area sa ALQC.
Siya niingon nga ang insidente mikalas og labing menos 77 ka mga kinabuhi, naguba ang mga panimalay ug pipila ka mga tawo nga nawala hangtod karon.
Siya nidugang nga ang iyang EO 22 giisyu human siya nag-obserbar samtang naglupad ibabaw sa lugar pinaagi sa hinulaman nga helicopter ug nahibaw-an nga ang padayong massive operation sa ALQC usa ka “dayag nga pagsalikway” sa kaluwasan sa mga lumulupyo nga nagpuyo sulod o duol sa nahisgutang mga lugar sa MPSA.
Niadtong Disyembre 3, 2024, si Garcia nipagawas og executive order nga nagmando sa ALQC sa pagsuspenso sa tanang earth-moving operations sulod sa MPSA niini tungod sa safety concerns. /EHP
