GITIN-AW sa Alliance of Concerned Teachers (ACT)-Davao Region nga ang P20 nga kontribusyon alang sa unyon boluntaryo lang.
Nigawas ang pahayag human nga nihangyo ang usa ka grupo sa mga magtutudlo nga ihunong na ang pagkaltas niini sa ilang suweldo.
Gisulti ni ACT-Davao Region president Elenito R. Escalante ngadto sa mga tigbalita niadtong Sabado sa hapon, Nobyembre 30, 2024, sa Freedom Park, Davao City, di makaayo ang paghunong sa koleksiyon kay duna man gani matud pay ubang unyon sa mga trabahante nga nagakaltas pa og mas taas gikan sa ilang mga miyembro.
Iyang gi-esplikar nga bisan tuod kon dunay pipila ka mga tawo nga nagkarkulo sa kantidad sa unyon nga madawat, ang maong kantidad di pa gani igo aron nga isustiner sa mga kalihukan sa unyon.
“Ginaawhag nato nga magpa-miyembro ta kay ang atong union mao kini ang tinuod na nagabarog para sa atong katungod, para sa atoang suholan, para sa karapatan ng mga teachers,” panawagan pa niya.
Dugang ni Escalante nga ang P20 nga koleksiyon gigamit alang sa mga operasyon sa unyon, sama sa pangampanya, pinaagi sa nakuha nilang clothing allowance alang sa mga magtutudlo. Iya sab nga gihisgutan nga ang grupo kasamtangang nagduso alang sa P50,000 entry-level salary alang sa mga magtutudlo, nga naghangyo og dugang pundo aron pagsuporta sa ilang paningkamot.
Iyang giklaro nga ang P20 maoy binulan nga bayad, apan matud niya, “It would be great if all teachers contribute P20.” Sulti niya nga ang Department of Education (DepEd) otomatiko nga magkaltas niini gikan sa mga suweldo sa mga miyembro nga magtutudlo ug mag-remit niini ngadto sa unyon. Apan, ang kantidad nga ilang madawat gamay ra gyud, kay wala gani makaabot kini sa tanang mga magtutudlo sa 11 ka mga dibisyon sa rehiyon.
Dugang gi-esplikar sa ACT-Davao Region nga di tanang mga magtutudlo nagbayad sa P20; kadto lang nakakompleto sa registration form. Iyang gipahimug-atan nga ang membership ug ang bayad boluntaryo lang.
Samtang ang pahayag gikan sa wala magpaila nga tinubdan nga gipadala sa opisyal email sa SunStar Davao, usa ka grupo sa mga magtutudlo gikan sa pampubliko nga tulunghaan nilantugi nga ang binulan nga P20 union fee angay nang ihunong. Kini nga pahayag nahitabo human ang viral video kung diin usa ka magtutudlo gikan sa Daniel R Aguinaldo National High School nagkomprontahe kang ACT Representative Antonio Tinio human iyang gihisgutan ang confidential funds ni Vice President Sara Duterte.
Dugang sa grupo nga angay nang ihunong ni Tinio ang paggamit sa ilang mga pangalan ug imahe alang sa benepisyo sa ACT Teachers, pinaagi sa pag-ingon nga ang ilang tulunghaan non-partisan ug wala magsuporta sa panawagan alang sa pag-impeach kang Duterte, bisan pa sa mga pahayag gikan kang ACT Partylist Representative France Castro.
“Sa pangkalahatan, ang mga guro ay nagtataguyod ng kanilang karapatan na hindi mapagkamalang konektado sa mga politikal na usapin at nananawagan para sa mas malayang pagpapahayag ng kanilang mga opinyon at desisyon na hindi pinipilit ng anumang partido o grupo,” matud sa grupo.
Ang grupo nag-awhag sab sa proteksiyon sa mga magtutudlo, kay ang magtutudlo nga nakita sa viral video nag-atubang og mga atake tungod sa pagsulti sa kamatuoran.
Nisulay ang SunStar Davao sa pagkontak sa DepEd-Davao Region alang sa pagkomento apan sukad sa pagsuwat ning balita wala pa’y tubag ang buhatan. (Rojean Grace G. Patumbon)
