COTABATO CITY — Sa usa ka semana nga operasyon sa kapulisan sa Bangsamoro Autonomous Region in Muslim Mindanao (BARMM), mokabat sa 67 ka mga malapason sa balaod ang nasikop sa rehiyon.
Sa sinemanang taho sa Philippine National Police (PNP-BARMM), giingong lakip sa nasikop mao ang mga wanted persons, drug pushers, illegal gambling, smugglers, ug illegal loggers.
Sumala kang BARMM Police Regional Director, Brigadier General Romeo Macapaz nga 32 sa mga dinakpan adunay kalambigitan sa druga ug nakuhaan og 127 gramos nga shabu nga mobalor og kapin sa P800,000.
Sa nagpadayon nga manhunt operation sa PNP batok sa mga wanted persons, 20 na ang ilang nasikop.
Narekober usab ang 72 loose firearms ug nasakmit sa PNP ug lima ka tawo ang ilang nasikop nga nagdala og walay lisensiya nga armas samtang nasakmit ang usa ka explosive device.
Sa gipalig-on nga anti-gambling operation, upat ang ilang nasikop samtang unom ang nakalapas sa mga ordinansa sa munisipyo.
Samtang mokabat sa 13 sakop sa lokal nga teroristang grupo ang boluntaryong mitahan. (Edgar E. Fuerzas)
