Mga duwa karon:
5:00 pm- TNT batok Terrafirma
7:30 pm- Ginebra batok Rain or Shine
Pulos mosuway pagpaduol sa Top 2 ang Brgy. Ginebra Gin Kings ug Rain or Shine Elasto Painters sa ilang panagsangka sa main game karong Miyerkules sa gabii, Enero 22, 2025, sa Philippine Basketball Association (PBA) Season 49 Commissioner’s Cup sa Ynares Center sa Antipolo City.
Ning pagsuwat, nahilakip ang Gin Kings ug Elasto Painters sa walo sa 13 ka teams nga aduna pa’y paglaom nga makasulod sa Top 2 – depende sa resulta sa nahabiling mga duwa.
Ang Elasto Painters adunay 6-3 nga rekord samtang ang Gin Kings naggunit og 6-4 nga baraha.
Kon mapilde ang Elasto Painters magpabilin pa nga buhi ang ilang paglaom alang sa Top 2 apan kuli na kining mahitabo samtang kon ang Gin Kings ang mapilde, hayan motigom na ang ilang paglaom sa Top 2.
Mahinungdanon ang pagsulod sa Top 2 kay maghatag kini og twice-to-beat nga benepisyo sa quarter-finals.
Ang modaog ning sangkaa makaikyas na sab No. 7 ug No. 8 nga mga puwesto diin ang masulod niini mao ang makigparang sa Top 2 teams sa quarter-finals.
“Naka-anim na panalo na kami. From the start, habol namin pitong panalo para sigurado sa quarters at maka-iwas sa No. 7 and No. 8 (adunay twice-to-win disadvantage). Subukan natin, baka kayanin,” matod ni Rain or Shine coach Yeng Guiao.
Sa premirong duwa, ang TNT Tropang Giga makigbatok sa nagsalimoang nga Terrafirma Dyip.
Ang Tropang Giga, nga naggunit og 6-2 nga rekord, adunay sama og intensyon sa Gin Kings ug Elasto Painters.
Sa ilang bahin, pagpreserba na lang og gamay nga garbo ang tinguha sa Dyip sa ilang pagpakigsangka sa Tropang Giga.
Ang Dyip, nga mosagubang sa katapusan nilang tahas, wala pa nakatilaw og daog sulod sa 11 ka mga duwa ug maoy labing unang nanamilit og sayo sa komperensya. / ESL
