Sa pag-obserbar sa Dakbayan sa Sugbo sa ika-161 nga Adlaw sa Andres Bonifacio, si Bise Mayor Donaldo Hontiveros niingon nga ang mga alagad sa publiko kinahanglang motrabaho nga may integridad, mopatigbabaw sa hustisya, ug ibutang ang kaayohan sa uban kay sa ilang kaugalingon.
Si Hontiveros, pangulo sa City Cultural and Historical Affairs Commission (Chac), usa ka hugpong nga responsable sa pagpreserba ug pagpasiugda sa kultura ug kasaysayan nga kabilin sa dakbayan, niingon sa iyang pakigpulong sa Plaza Independencia nga iya naobserbahan ang estatwa ni Andres Bonifacio nga nagpunting sa tudlo sa unahan.
Gihulagway ni Hontiveros ang estatwa nga adunay nagpunting sa usa ka tawo, nga nag-ingon nga gihagit ni Bonifacio ang mga kawani sa gobyerno nga buhaton ang ilang bahin.
Matod niya nga ang kinabuhi ni Bonifacio naghatag og lawom nga leksyon sa serbisyo publiko.
“His humility, sacrifice, and determination serve as a guide on how we can contribute meaningfully to the beloved Cebu City,” matod sa Bise Mayor.
Dugang pa, si Konsehal Francisco Esparis niingon nga ang kinabuhi ni Bonifacio nagpamatuod nga ang gugma sa usa ka tawo sa nasod wala magdepende sa katilingbanong klase ug kalampusan.
“Kabus man o maadunahan, yamhiran ka man o dinayeg, kitang tanan adunay katakos sa paghigugma sa yuta tang natawhan nga mao ang Pilipinas,” matod ni Esparis.
Siya miingon nga ang mga Pilipino adunay usa lamang ka nasod nga mao ang Pilipinas, ug nga “kinahanglan natong higugmaon kini.”
Kauban sa Bise Mayor ug Konsehal Esparis sila si North District Congresswoman Rachel del Mar ug Arsenio Pacaña, Chac Commissioner.
Si Andres Bonifacio natawo niadtong Nob. 30, 1863, sa Manila ug namatay niadtong Mayo 10, 1897.
Usa siya ka patriyot sa Pilipinas, magtutukod, ug lider sa nasyonalistang Katipunan nga katilingban nga nagpasiugda sa pag-alsa batok sa mga Katsila niadtong Agusto 1896, usa ka mahinungdanong panghitabo nga nagtimaan sa pagsugod sa Rebolusyong Pilipino.
Ang pamunoan ni Bonifacio ug ang iyang panawagan alang sa kagawasan nakadasig sa daghang mga Pilipino sa pag-apil sa pakigbisog alang sa kagawasan.
Dili sama sa nasudnong bayani ug nobelista nga si Jose Rizal, nga gustong magreporma sa pagmando sa Espanya sa Pilipinas, si Bonifacio nagpasiugda alang sa hingpit nga kagawasan gikan sa Espanya. / JPS
