Patay nang nalandig sa tambalanan ang duha ka drayber sa motorsiklo ug angol ang usa ka angkas sa panagbangga, alas 12:30 sa hapon, Dominggo, Nobiyembre 24, 2024, sa national highway sa Brgy. Magdugo, siyudad sa Toledo.
Usa sa namatay nga nagmaniho sa motorsiklo mao si Jeremy Rizon, hamtong ang panuigon, taga Barangay Jampang, lungsod sa Argao, ug angol mao ang iyang angkas nga si Bonifacio Tranilla, hamtong ang panuigon, ug taga Baranay Arpili, lungsod sa Balamban.
Laing namatay nga nagmaniho sab sa motorsiklo ang wa pa mailhi atol ning pagsuwat human way sud identificaiton card ang iyang pitaka ug way plate number ang gimaneho nga motorsiklo.
Sa pasiunang imbestigasyon sa kapulisan sa Toledo ubos sa direktiba sa ilang hepe nga si P/Lt. Col. Wilfredo Alarcon Jr. nasuta nga si Rizon nagpadung sa Balamban ug ilang gikasugat ang motorsiklo nga gimaniho sa wa mailhing lalaki nga giingong nikawas sa lane.
Kini ang hinungdan nga pagkadinasmagay ug tungod sa kakusog sa impact, nangalabay ang mga sakay sa motorsiklo ug guba kaayo ang mga motorsiklo.
Ang tulo gidali sa pagtabang sa mga rerscuer sa Toledo ug gidala sa Toledo City General Hospital, apan ang duha ka mga drayber sa motorsiklo ang gideklarar nga dead on arrival sa attending physician. / DVG
