Bag-ong nailhan nga drug personality ang nadakpan sa gilusad nga buy bust sa mga operatiba sa Philippine Drug Enforcement Agency (PDEA) 7 inabagan sa Talamban Police Station ala 1:25 sa hapon, Huwebes, Nobiyembre 7, 2024 sa Sitio Binaliw 1, Barangay Binaliw, Cebu City.
Ang dinakpan nailhan nga si Joshua Villamor, 27, residente sa maong dapit ang nakuhaan og duha ka mga dagkong putos nga adunay gituohan nga shabu nga motimbang sa 100 gramos nga gibanaban nga mokantidad og P680,000, giimbargo ang cellular phone ug motorsiklo niini.
Matod ni Leia Alcantara information officer sa PDEA 7 nga duha ka semana nila nga gipaubos sa case buildup ang suspetsado kinsa giingong makabaligya og 100 gramos nga shabu matag semana.
Dugang ni Alcantara nga ang barangay Binaliw gideklara nga drug cleared niadtong Abril 13, 2023 human maihap ang tanang drug personalities sa maong dapit sa Barangay Anti-Drug Abuse Council (BADAC).
Mipasabot si Alcantara nga bag-ong salta sa ilegal nga drugas si Villamor human ang mga inila nga drug personality sa maong barangay ang napaubos na sa barangay drug rehabilitation program.
Base sa imbestigasyon bag-o lang misulod sa maong matang sa ilegal nga kalihukan si Villamor ug wala usab ni rekord nga nalambigit sa drugas.
Giklaro ni Alcantara nga ang pagkasikop ni Villamor dili makaapekto sa status sa barangay nga gideklara nga drug cleared barangay sanglit wala man ni mogawas ang iyang pangalan sa mga nailhan nga nalambigit sa ilegal nga drugas. / AYB
