GIDASIG sa lokal nga panggamhanan sa Davao City ang Dabawenyos nga mosunod sa gitakda nga mga sumbanan nga iimposar alang sa taliabot nga All Saints’ Day ug All Souls’ Day.
“Atong sundon ang mga guidelines alang sa hapsay nga pagsaulog sa kalag-kalag sa dakbayan karong tuiga,” awhag sa LGU-Davao City sa ilang abiso, Huwebes, Oktubre 17, 2024.
Mga Dabawenyo kinsa nagplano nga mobisita sa mga sementeryo sa adlaw sa kalag-kalag gidid-an sa pagsul-ob og jackets, pagdala og backpacks, paggamit og kusog nga speakers sulod sa mga sementeryo, pagdala og mga ilimnong makahubog, ug pagdala og mahait nga mga butang.
Mga mobisita gidid-an sa pag-estar tibuok gabii sa pampubliko nga mga sementeryo; apan sa mga pribadong sementeryo gitugtan ang “overnight stays” agad sa diskresiyon sa tagdumala. Ang paggamit og drones ug pagdala og mga pusil istriktong gidili.
Gidid-an sab ang mga makililimos, estambay, ug mga mangangaykay nga mosulod sa sementeryo. Mga pampublikong sementeryo sa siyudad mobukas alas 6 sa buntag ug mosira alas 8 sa gabii gikan sa Oktubre 30 hangtud sa Nobyembre 3, samtang mga pribadong mga sementeryo mahimong mag-imposar sa ilang kaugalingong oras.
Gidasig sab ang mga mobisita nga manglimpyo sa ilang lugar ug ilabay sa tamang labayanan ang mga basura una mobiya. Gihangyo sab sa LGU ang publiko nga mosunod sa instruksiyon sa Safety and Security Cluster bahin sa seguridad.
Ang City Transport and Traffic Management Office (CTTMO) mopatuman og traffic scheme, route designations, ug traffic management plan alang sa maong kasaulogan. Gipahimangnoan ang publiko nga ang siyudad mopatuman og “one-entry and one-exit policy”.
Kabataan, katigulangan, mabdos nga kababainhan, “immunocompromised” nga mga indibiduwal, way bakuna, kadtong dunay mga “comorbidities” gidasig nga magsul-ob og face masks. Naa sab ipahimutang nga medical tent kung dunay mga medical emergency sa mga ganghaan sa mga sementeryo.
Sa pikas bahin, kadtong mga manindahay nga nakakuha og Special Permits gikan sa City Mayor pinaagi sa Business Bureau gitugtan nga makabaligya sa ilang mga produkto gikan Oktubre 30 hangtud Nobyembre 3, sulod o sa duol sa mga sementeryo.
Apan mga manindahay gidid-an nga mamaligya og mga ilimnong makahubog, “ukay-ukay”, o mamaligya og pagkaon nga naggamit og barbecue sticks, apil na ang mga mahait nga mga butang sama sa kutsilyo, cutters ug gunting.
Gidid-an sab sila sa paggamit og plastic spoons, forks, stirrers, cups, ug plates. Magbaton sab sila og kaugalingong basurahan sa gidesignar nga lugar alang sa biodegradable, non-biodegradable, ug recyclable waste.
Gidid-an sila nga magluto sab sa aseras kay makahasol kini sa mga tawo nga mosulod ug mogawas sa sementeryo.
Ug kinahanglan nga manglimpyo sab sila sa lugar nga gibaligyaan una sila mobiya. (Rojean Grace G. Patumbon)
