Gi-ban sa Japan Boxing Commission (JBC) si Filipino John Riel Casimero gumikan sa iyang pagka-overweight sa official weigh-in, usa ka adlaw sa wa pa siya nakigharong ni American Saul Sanchez niadtong Dominggo, Oktubre 13, 2024, sa Yokohama, Japan.
Pipila ka mga adlaw human sa away, diin yanong gipaundang ni Casimero si Sanchez sa ika-2:41 minutos sa 1st round, gianunsyo sa JBC nga ilahang gisuspenso og usa ka tuig ang gitawag og “Quadro Alas”, basi sa taho sa www.boxingscene.com.
Sa official weigh-in, si Casimero nitimbang og 124.12 lbs. sa premiro niyang patong sa weighing scale, lapas og usa ka kilo sa 122 lbs. weight limit samtang si Sanchez nitimbang og 121.7 lbs.
Gitagaan og duha ka mga oras si Casimero aron makapaus-os og timbang apan wala gihapon kini nakakuha sa weight limit sa ikaduhang pagsuway diin nitimbang siya og 123 lbs.
Hinuon taliwala niini, nanghinaot si Casimero nga ang makapaukyab niyang daog batok ni Sanchez makaabli og pultahan alang sa mas dakong away sa umaabot.
Si Casimero, kinsa adunay 34-4-1, 23KOs nga rekord, taudtaod na sab nga nagsigeg panghagit ni Japan boxing superstar Naoya “Monster” Inoue apan hangtod karon, hanap pa gihapon ang posibilidad. / ESL
