Tungod sa hangyo alang sa mas kusog nga internet connection, nasakpan ang gidudahang ilegal nga kalihukan nga posibleng dunay kalambigitan sa Philippine Offshore Gaming Operation (Pogo) sa Barangay Saavedra, lungsod sa Moalboal niadtong Miyerkules, Oktubre 9, 2024.
Sumala sa taho, si Moalboal Mayor Inocentes “Titing” Cabaron dunay nakuha nga impormasyon kalabot sa tagdumala sa Happy Bear Resort nga nag-request og mas high-speed wifi.
Mitumaw ang pagduda sa mayor kon nganong kalit nga nag-request niini ang Happy Bear hinungdan nga iyang gimanduan ang Bureau of Fire Protection (BFP) nga susihon ug ipaubos sa fire inspection ang resort.
Dihang niabot sa dapit, ang kabomberohan nitawag dayon sa kapulisan human nasuta nga pulos Chinese nationals ang nagpuyo sa maong resort ug walay bisan usa kanila ang makasulti og Iningles niadtong tungura.
Hinuon, matod sa mayor, legal ang operasyon sa resort ug ang grupo sa Chinese nationals nag-abang lang.
Samtang wala gikonsiderar sa mayor nga alarming ang presensiya sa 38 ka undocumented Chinese nationals nga nasikop sa kapulisan sa lungsod labina wa pa usab masuta hingpit kon sila dunay ilegal nga kalihukan sama sa Pogo.
Dili ba kaha sila yanong mga turista? Ang Molaboal naila sa lokal ug langyaw nga turista tungod sa puti sa baybayon ug ang naila sa kalibutan nga nindot nga dive site.
Apan dili usab malikayan ang pagduda sa katawhan tungod kay sibaw karon ang kontrobersiya sa Pogo human sa unang pagronda nga Pogo hub sa Pampanga ug sa Dakbayan sa Lapu-Lapu ning ulahi.
Nasayran nga legal ang Pogo sa nasod sa panahon ni kanhi Presidente Rodrigo Duterte, apan mahimong ilegal dihang giabusohan ug gigamit sa scam nga nagbiktima sa mga Intsek sa mainland China hinungdan sa pagpasuko sa Chinese government.
Kini ang hinungdan nga si Pres. Ferdinand Marcos Jr., atol sa iyang State of Nation Address (Sona) niadtong Hulyo ni-ban sa tanang Pogo operations sa nasod.
Bisan ang ilang presensiya nakatampo og dako sa panudlanan sa nasod apan dili usab sakto nga ang nasod mahimong base sa ilegal nga kalihukan sa Pogo ug uban pa.
Ug ang nahitabo sa Moalboal maayong makuhaan og leksiyon sa mga tag-iya og resort, mga edipisyo ug lokal nga kagamhanan nga magbantay sa mga moabang aron ang magnegosyo dili mahasol ug maapil sa kontrobersiya.
Lakip kitang mga yano nga lumolupyo nga motabang sa pagpaniid sa palibot ug motaho dayon sa kapulisan kon dunay mamatikdan nga kadudahang lihok sa usa o grupo sa mga tawo sa usa ka dapit.
Mas epektibo ang serbisyo sa kapulisan kon dunay suporta sa katawhan.
