Girehistro sa Mandaue City ug Lapu-Lapu City ang labing daghang kadaugan sa Quest for Champions 10 Inter-island amateur boxing show ning bag-uhay lang sa LAS Boxing Fitness Gym sa Lapu-Lapu City.
Ang duha ka mga dakbayan nakatali og lima ka kadaugan matag usa sa amateur boxing show nga giorganisar sa Noy Pacing Flores (NPF) Boxing Academy ug VSG Promotions.
Gipangulohan ni Palarong Pambansa bronze medalist Jerson Inon ang mga ningdaog sa Mandaue sa iyang pagpukan ni Excel Salait sa Camiguin pinaagi sa unanimous decision sa main event.
Ang ubang mga boksidor sa Mandaue nga ningdaog mao sila sila si Joebert Boncales batok ni Ronald Revil sa Bohol (SD), John Rio Joren batok ni Adrian Decio sa Palawan (SD), John Eronico batok ni Jay-Ar Andam (SD), ug Marvin Villafuerte batok James Loyd Awit (3rd rd. stoppage).
Sa habig sa Lapu-Lapu, ang mga ningdaog mao sila si Gian Dela Torre batok Nick Lasado sa Cebu City (SD), Sandro Ypil batok Noel Semblante sa Mandaue (UD), Kenneth Saniban batok John Vincent Ano sa Bohol (UD), Kylle Siaton batok Romel Lasado sa Cebu City (UD), ug Tristan Brigoli batok Rain Yossak sa Bohol (UD).
Ang Bohol nakarehistro og tulo ka mga daog diin gipukan ni John Michael Ano si John Deep Casipit sa lapu-Lapu (1st rd. stoppage), James Caro batok ni Geof Evan Tangoan sa Lapu-Lapu (SD), ug gipaundang ni Jhanna Correa si Alexah Juesan sa Cebu City sa first round.
Sa lain pa nga mga away, niresulta sa panagtabla ang away nila ni Kai “Aloha Kid” sa ormoc ug Zarah Tabastas sa Palawan samtang ningdaog sila si Alyssah Juesan sa Cebu City batok ni Jamaica Apas sa Mandaue (SD), ug Gabriel Cocamas sa Camiguin batok ni Stephen John Colot sa lapu-Lapu (3rd rd. stoppage). / EKA
