GITAHO sa Office of Civil Defense-Davao Region (OCD-Davao) nga kapin sa 800 ka pamilya ang naapektuhan sa pagbaha ug landslide tungod sa Intertropical Convergence Zone (ITCZ) sa rehiyon.
Sa ilang inisyal nga katikaran, sukad alas 6:00 sa buntag, Biyernes, Disyembre 27, 2024, gisulti sa OCD-Davao nga gibanabana nga 877 ka pamilya gikan sa tulo ka mga barangay sa munisipalidad sa Malita, Davao Occidental, ug mga 10 ka pamilya gikan sa Barangay Manikling sa San Isidro, Davao Oriental, pugsanong gibakwit tungod sa pagbaha. Kini nga mga pamilya gipahimutang sa upat ka mga evacuation centers sa lugar.
“Flooding and landslide incidents occurred in some municipalities of Davao Region particularly in Davao Occidental, Davao del Sur, and Davao Oriental,” matud sa buhatan.
Sumala sa OCD-Davao nga naglusad sila og “preemptive and forced evacuations” sa mga naapektuhan nga mga barangay sa Malita, Davao Occidental, ug San Isidro, Davao Oriental.
Gitaho sab sa buhatan nga ang Lais Bridge sa Davao-Sarangani Coastal Road di maagian, samtang ang National Bridge sa Malita, Davao Occidental, nadanyos ang bridge approach. Hinuon, alas 6 sa buntag, nihubas na ang tubig-baha.
Dugang pa sa OCD-Davao nga disaster response teams gikan sa mga munisipyo, kasiyudaran, ug probinsiya naglusad og hugot nga pagmonitor sa ilang tagsa-tagsa ka mga areas of responsibility (AOR).
Padayon ang buhatan sa pagmonitor sa kahimtang sa maong mga lugar ug andam nga dugangan ang response teams ug relief assistance kung gikinahanglan. Gimentinar sab nila ang ilang information dissemination pinaagi sa social media, email, SMS, Messenger, ug Viber.
Sa Regional Geohazard Threat Advisory No. 1, giisyu sa Mines and Geosciences Bureau-Davao Region (MGB-Davao), Biyernes sa buntag, Disyembre 27, ang buhatan nagpahimangno sa mga lugar nga grabe ka peligro sa pagbaha ug landslide nga kinahanglan nga mag-alerto tungod sa padayong epekto sa ITCZ.
Gikanayon sa MGB-Davao nga bisan ang mga lugar nga wala gikonsidera nga grabe kapeligro sa kalamidad kinahanglan sab nga magbinantayon.
Nagpasidaan ang buhatan sa mga lugar nga naa sa tiilan sa mga bukid ilabi na gyud kadtong mga lugar nga dunay gitaho nga mga liki sa yuta, mga lugar nga duol sa aktibong landslide nga dapit, ug mga daplin sa kalsada kon diin dunay mga lawom nga bahin tungod sa pagpalambo sa dalan.
Gipaamping sab sa buhatan ang mga lugar nga naa sa daplin sa mga suba, kanal, ug uban pa ilabi na gyud sa mga peligro sa landslides. Giila sab nila ang mga lugar nga gikonsidera nga “moderately to highly susceptible” sa mga landslide, base sa mapa sa MGB-Davao.
“The MLGUs (municipal local government units) should ensure that all evacuation centers are safe from landslides, flood or flashflood, and debris flow,” pagtin-aw sa MGB-Davao.
Kahinumdoman, ang City Information Office of Mati City nagtaho nga niadtong Disyembre 26 nga ang kusog nga pag-ulan maoy hinungdan sa pagbaha sa mga barangay sa Tamisan, Bobon, Mamali, ug Macambol. Duna say gitaho nga landslide sa Zigzag Roads sa Badas, nga nakatandog sa dagan sa trapiko.
Gitaho sa Mati-CIO nga ang City Engineer’s Office ug ang rescue teams nagpalihok sa ilang rekursos ug naglusad og clearing operations aron nga ablihan og balik ang apektado nga mga dalan.
Si Jason John Joyce, mayor sa Jose Abad Santos sa Davao Occidental, ni-post sa Facebook niadtong Disyembre 26, nga nag-awhag sa mga motorista nga likayan ang pagbiyahe, kay daghang landslide ang nahitabo sa lugar ug ang tulay sa munisipyo sa Malita di pa maagian. (Rojean Grace G. Patumbon)
