Moabot na sa 430 ka mga armas ang nasakmit sa Police Regional Office (PRO) 7 sulod sa 30 ka adlaw human gipatuman ang pagsakmit sa loose firearms subay sa pagpangandam sa midterm elections karong Mayo.
Kini nga inisyatiba gihimo aron sa paghatag og kasiguroan sa integridad ug kaluwasan sa proseso sa piniliay.
Gikan sa Enero 1-31, 2025, ang PRO 7 malampuson nga nakasakmit sa 430 ka loose firearms ug napulo ka explosives ug pagkasikop sa 117 ka mga tawo atol sa 410 ka operations.
Atol sa revitalized Oplan Katok program nga gipatuman sa PNP, nakakuha sila og 22 ka armas nga gitahan sa police stations sa mga gun holder tungod kay wala pa maproseso ang ilang dokumento samtang ang Kontra Boga operations nakasakmit og 408 ka armas.
Si Police Brigadier General Redrico Maranan, hepe sa kapulisan sa Central Visayas nipahibawo nga ang maong inisyatiba gituyo aron mapugngan ang posibleng mahitabo nga kagubot ug pagpanghadlok sulod sa election period.
Atol sa pagduaw ni DILG Secretary Juanito Victor Remulla sa PRO 7 niadtong Pebrero 5, gipresentar ni Maranan ang maong mga armas. / AYB
