NAARESTO sa mga awtoridad ang tulo ka mga Chinese nationals ug usa ka Pinoy nga backhoe operator sa gilusad nga hiniusang operasyon sa gipakusgan nga kampanya batok ilegal nga pagmina sa Purok 2, Barangay Mambing, New Corella, Davao del Norte niadtong Enero 22, 2025.
Mga nahisgutan giingong nalambigit sa way pagtugot nga aktibidad nga pagmina hinungdan nga gipangsignit sa mga tinugyanan sa balaod.
Mga nadakpang Chinese nationals napakyas nga makapresentar og gikinahanglan nga permiso ug mga legal nga dokumento aron nga dasonan ang ilang operasyon hinungdan nga wala na maglangay ang mga awtoridad ug gipangposasan sila.
Nasakmit sa mga awtoridad ang nagkadaiyang ekipo nga gigamit sa ilegal nga kalihukan, apil ang tulo ka backhoe units, upat ka water pumps, ug duha sets sa fabricated screeners.
Mga nadakpan nga indibiduwal naa karon nakakustodiya sa New Corella Municipal Police Station alang sa tukmang disposasyon. Samtang ang buhatan sa Mines and Geosciences Bureau Region XI ug ang Philippine National Police (PNP) nag-andam na sa pagpasaka og tukmang mga kaso batok kanila.
Nasayran nga ang malampuson nga operasyon gialayonan sa paningkamot sa mga personahe gikan sa Police Regional Office 11 (PRO 11) ilawom sa New Corella Municipal Police Station, Mines and Geosciences Bureau Region XI, Provincial Environment and Natural Resources Office (PENRO-Davao del Norte), Department of Environment and Natural Resources/City Environment and Natural Resources Office (DENR/CENRO), ug sa National Commission on Indigenous Peoples (NCIP). (Wenz G. Mendoza)
