COTABATO CITY — Balhog sa prisohan ang 18-anyos nga ulitawo ug pasakaan og kasong kalapasan sa Republic Act 9211 o Tobacco Regulation Act ug RA 4712 kon Anti-Smuggling Act human madakpi nga nagpayuhot og smuggled nga yosi alas 4:00 sa hapon, Sabado, Disyembre 21, 2024, sa Parang, Maguindanao del Norte.
Giila ang suspek nga si alyas Gerald kinsa nagpuyo sa Parang, Maguindanao del Norte.
Sumala ni Parang Chief of Police, Police Major Brayn Lomas-e nga nagpatrolya ang iyang mga sakop sa palengke sa lugar sa dihang ilang nasiplatan ang suspek nga nag-inventory og smuggled cigarettes.
Sa dihang gisusi kini sa mga pulis, walay mga dokumento ang mga yosi hinungdan nga ilang gidakop si alyas Gerald.
Nakompiska sa mga pulis ang 40 ka karton sa Dunston cigarettes nga nagkantidad og P1,120,000.
Mga smuggled cigarettes giingong nagagikan sa Zamboanga City nga gipalusot sakay sa motor banca paingon sa Maguindanao del Norte.
Naa na sa costudial facility sa Parang Municipal Police Station ang suspek ug gitakdang pasakaan og tukmang kaso. (Edgar E. Fuerzas)
